Malbata Rojîn Kabaîşê û hevalên wê yên zanîngehê ji bo ku kujerên Rojîn Kabaîşê bêne dîtin li Qada Deriyê Çiyê çalakiya rûniştinê li dar xist û daxwaza edaletê kir.
Malbata Rojîn Kabaîşê û hevalên wê yên zanîngehê ji bo ku kujerên Rojîn Kabaîşê ya ku salek beriya niha cenazeyê wê li qeraxê Gola Wanê hatibû dîtin, li Qada Deriyê Çiyê ya Bajarê Nû ya Amedê çalakiya rûniştinê li dar xist. Tevgera Jinên Azad (TJA), Partiya Herêmên Demokratîk (DBP), Partiya Wekhevî Demokrasiyê ya Gelan (DEM Partî), Baroya Amedê, Komeleya Hiqûqnasên ji bo Azadiyê (OHD), Komeleya Mafên Mirovan (ÎHD), Platforma Jinan ya Baroya Amedê û gelek endamên saziyên civakî beşdarî çalakiya rûniştinê bûn.
Di çalakiya rûniştinê de dovîzên “Rojîn li benda edaletê ye”, “Edalet ji bo Rojînê”, “Çi hat serê Rojînê?”, “Ji bo Rojînê bibe deng” û “Xeyalên Rojînê yên ku nîvco man li vir in” hatin hilgirtin. Her wiha dirûşmeyên weke “Heq hiqûq edalet”, “Bêdeng nemîne dê dor bê te jî”, “Pergal lê dixe dewlet diparêze” û “Jin Jiyan Azadî” dihatin berzkirin.
Endama Komîteya Edaletê Zelîha Taşkiran daxuyanî xwend. Zelîha Taşkiranê diyar kir ku jin pêvajoyê gav bi gav dişopînin û wiha got: “Hewl dan ku qetilkirina Rojînê bi gotina wê xwe kuştiye veşêrin, ev yek ne hiqûqî ye. Biryara qedexekirinê ne ji bo ewlekariya dosyayê ji bo rastiyan ji malbat û parêzeran veşêrin hatiye dayîn. Bi veşartina delîlan sûc hatiye kirin, ev eşkere hevparê kuştina jinê ye. Baroya Wanê û Baroya Amedê derbarê ATKê de serlêdana sûc kir. Em ê jî pêvajoyê bişopînin. Em ê li hemû bajaran dakevin qadan û têkoşîna xwe ya ji bo edaletê berfireh bikin.”
