Parlamenterê Die Linke yê Parlamenta Federal Ferat Koçak destnîşan kir ku eger hikûmeta Alman piştgiriyê dide pêvajoya aştiyê, gava destpêkê divê rakirina qedexeya li ser PKKê be.
Parlamenterê Partiya Çep (Die Linke) a Alman Ferat Koçak ji ANFê re axivî û anî ziman ku weke partî ji xwe ew dixwazin qedexeya li ser PKKê bê rakirin ku Kurdan krîmînalîze dike û wê mijarê careke din bixin rojeva Parlamenta Federal.
Ferat Koçak destnîşan kir ku pêvajoya aştiyê gelekî girîng e û divê li Almanyayê jî gavên li gorî vê pêvajoyê bêne avêtin.
Koçak diyar kir ku piştî Kongreya 12emîn a PKKê divê qedexeya li Almanyayê ya li ser PKKê bê rakirin û anî ziman ku wê mijarê bixin rojeva Parlamenta Federal. Ferat Koçak wiha got: “Weke Partiya Çep em alîgirê wê yekê ne ku qedexeya li Almanyayê ya li ser PKKê bê rakirin. Em ê li ser vê yekê pêşnûme pirsan pêşkêş bikin. Hikûmeta Alman ji xwe diyar kir ku ew piştgiriyê dide pêvajoya aştiyê. Eger piştgiriyê dide pêvajoya aştiyê gava destpêkê divê rakirina qedexeya li ser PKKê be, li Elmanyayê jî pêvajoya aştiyê pêk bîne.”
