Amed – Jinbira girtî Xêredîn Adak, Fatma Adakê diyar kir ku Rêveberiya Girtîgeha Ewlehiya Bilind a Samsûnê mafê nameyan ê girtiyan asteng dike û got: “Rêveberiya girtîgehê ji bo ji girtiyan pere bistîne nahêle girtî di nava nameyekê de gelek nameyan bişînin. Rêveberiya Girtîgehê çav berdeya berîka girtiyan.”
Xêredîn Adak ji sala 2006an vir ve girtî ye. Xêredîn Adak di meha Adara 2025an de ji Tîpa T a Girtîgeha Burhaniyeyê ya Balikesîrê sirgûnî Girtîgeha Ewlehiya Bilind a Samsûnê hatiye kirin. Xêredîn Adak ji wir jî bi gelek zextan re rû bi rû maye. Rêveberiya girtîgehê mafê atolyeyê yên girtiyên siyasî asteng dike û hefteyê tenê saetekê mafê sporê ya girtiyan heye. Her wiha hat zanîn ku rêveberiya girtîgehê girtiyên edlî jî li cem qawîşên girtiyên siyasî bicih kirin e. Rêveberiya girtîgehê bi biryareke sosret mafê nameyan ên girtiyan jî asteng dike. Rêveberî destûr nade ku girtî gelek nameyên xwe di nava nameyekê de bişînin. Bi vê sepanê re ji girtiyan dixwazin ku her kes nameyê cuda bişîne û pereyan ji wan bistînin.
Jinbira girtî Xêredîn Adak, Fatma Adak têkildarî rewşa girtiyan û biryara rêveberiya girtîgehê axivî û bertek nîşanî biryara girtîgehê da. Fatma Adak got ku rêveberiya girtîgehê çav berdaya berîka girtiyan.
‘Li Girtîgeha Semsûnê rewşa girtiyan nebaş e’
Fatma Adakê bi bîr xist ku Xêredîn Adak ji sala 2006an ve girtî ye û wiha got: “Xêredîn destpêkê li girtîgeha Mêrsînê hat ragirtin. Paşê jî ew şandin girtîgehên Edene, Îzmîr û Balikesîrê. Niha li girtîgeha Ewlehiya Bilind a Samsûnê tê ragirtin. Piştî bangawaziya birêz Abdullah Ocalan ya 27ê Sibatê sirgûnî Samsûnê hat kirin. Di girtîgeha Samsûnê de rewşa girtiyan nebaş e. Ew û sê hevalên wî sirgûnî Samsûnê kirin. Lê di heman girtîgehê de nikarin hevdu bibînin.”
‘Zext û zordarî zêdetir bûye’
Fatma Adakê anî ziman ku li gorî berê niha li girtîgehan bêtir mafên girtiyan tên binpêkirin û got: “Berê girtî dikaribûn tev li gelek atolyeyan bibin. Îro tenê hefteyê saetekî mafê wan ê sporê heye. Girtî berê dikaribûn di yek zerfê de ji gelek kesan re name bişînin. Berê 3 kes di heman qawîşê de bûna jî dikaribûn di nava yek zerfê de gelek name bişînin. Ew tişt hatiye qedexekirin. Rêveberiya girtîgehê ji bo ji girtiyan pere bistîne biryareke wisa daye. Ji ber ku çiqas zêde name were şandin ewqas zêde pere ji berîka girtiyan dê derkeve. Girtîgehê çav berdeya berîka girtiyan. Em bang li Wezareta Dadê dikin, îro aştî heye lê zext û zordariya li ser girtiyan berdewam dike. Divê demildest ev zilm û zordarî bi dawî bibe.”
