Şaredariya Erxaniyê xwaringeha gel vekir. Hevşaredarên Erxeniyê diyar kir ku bi projeyên wiha dixwazin ji gel re bibin alîkar û hewcedariyên gel ên aboriyê dabîn bikin.
Şaredariya Erxeniyê projeyek nû xist faliyetê. Şaredariyê bi beşdariya hevşaredaran Şîyar Guldîken û Bîrsen Azak Bayar, Cîgirên Hevşaredaran, Hevşaredarên Karaz û Hênê, hevserok û rêveberên rêxistinên DEM Partiyê û DBPê yên navçeyê û gelek welatî beşdarî merasîma vekirina xwaringeha gel bûn. Piştî merasîma pêşwazîkirinê ya bi def û zirneyê, kurdeleya vekirina xwaringehê hate birîn.
Hevşaredara Erxeniyê Bîrsen Azak Bayar di merasîma vekirinê de axivî û diyar kir ku ew bi vekirina xwaringeha gel kêfxweşin û got: “Em hêvî dikin ku ev xwaringeha gel ji bo welatiyên me bibe derfeteke baş û cihê hevgirtin û parvekirina navxweyî ya gel.”
Hevşaredar Şîyar Guldîken jî di vekirina merasîma xwaringehê de axivî û da zanîn ku wan ji roja destpêkê ve soza çêkirina vê projeye dabû û niha jî wê soza xwe pêk anîn. Şiyar Guldîken got: “Hemû hewcedariyên gel ji bo me girîng in û em ê hewcedariyên gel dabîn bikin. Çi ji destên me tê em ê pêk bînin.” Şiyar Guldîkan bal kişand ser giraniya aboriyê ya heyî û got ku hêviya wan ew e ku di vê atmosfera her tişt biha dibe de bi avakirina xwaringeha gel dixwazin alîkariya gel bikin.
Piştî axaftinan merasîma vekirinê pêk hat û hevşaredaran teyfikên xwarinê tije kirin û gel îro bi wesîleya vekirinê hate ezimandin.
Xwaringeha Gel a Erxeniyê dê ji bilî roja Yekşemê her roj di navbera saetên 11:30an heta 15:00an vekirî be. Xwaringeh dê rojane ji 700 kesî re xizmetê bike û menuya ku ji çar xwarinan pêk tê bi 120 lîreyî dide welatiyan.
