Şaredariyên DEM Partiyê yên Wanê di çarçoveya 25ê Mijdarê Roja Têkoşîna Li Dijî Tundiya Li Ser Jinan de kom bûn û xebatên xwe yên ji bo jinan kirine vegotin.
Di çarçoveya xebatên 25ê Mijdarê Roja Têkoşîna Li Dijî Tundiya Li Ser Jinan de bi pêşentiya Şaredariya Ebexê ya Wanê civînek agahdarî û nirxandinê ji bo pêşxistina navendên hevgirtina jinan hat lidarxistin. Civîna ku li Eywana Perwerdehiyê ya Parêzer Cûmhûr Keskîn ya Baroya Wanê hat lidarxistin, bi dirûşmeya “Ji bo jiyaneke azad û bê tundî gotina me neqediya! Em ê tundiyê bi hev re rawestînin” hat lidarxistin. Di eywana ku civîn lê hat kirin de pankarata “Jin jiyan e, jiyan xwebirêvebirin e” hat daliqandin. Hevşaredara Bajarê Mezin a Wanê Neslîhan Şedal, hevşaredarên navçeyên Wanê, nûnerên rêxistinên jinan ên li bajêr û nûnerên jin ên rêxistinên demokratîk beşdarî civînê bûn.
Civîn, bi nîşandana sînevîzyona ku xebatên navendên hevgirtinê û jinan ên ku ji hêla şaredariyên DEM Partiyê yên Wanê ve hatine vekirin, dest pê kir. Piştî sînevîzyonê Hevşaredara Ebexê Hatîce Atabay Gundogdû, da zanîn ku ew bi paradîgmaya demokratîk, ekolojîk û azadiyê jinê xebatên xwe dimeşînin û behsa xebatên xwe kir.
‘Aştî bê jinan ne mimkun e’
Piştre Hevşaredara Bajarê Mezin a Wanê û Hevşaredara GABBê Neslîhan Şedal mafê axaftinê wergirt û diyar kir ku ew xwedî hêz û vîna avakirina jiyaneke azad û wekhev in. Neslîhan Şedalêanî ziman ku ew di rêveberiyên xwecîhkî ku bi feraseta hevgirtinê ya nasnameya jinê xebatan dimeşîne de xeta azadiya jinê esas digirin û got: “Her wiha em bi rêveberiyên xwecîhkî re ji bo ev yek bêtir civakî bibe xebatan dimeşînin. Niha pêvajoyeke aştiyê heye, aştî bê jinan ne mimkun e û pêvajoyek bê jin nedemokratîk e. Em jin ku ewqas bi israr in vê têkoşînê bikin navneteweyî, divê hemû enerjiya xwe ji bo demokratîkkirina civakê û aştiya civakî xerc bikin. Em ê qadan neterikînin, em ê li meydanan bin, dê malek tune be ku em nekevinê, dê derîyek tune be ku em lê nexin. Têkoşîna me dê berdewam bike heta ku em azadiyê li her derê binexşînin.”
Dûre hemû hevşaredarên navçeyan û midûriyetên wan ên kar û barên jinan derbarê xebatên xwe yên ji bo jinan kirine de axivîn û bal kişandin ser têkoşîna jinan. Piştre rêveberên koperatîfan behsa kar û barên xwe û pirsgirêkên xwe kirin. Herî dawî Hevberdevka Konseya Bajêr Sevgî Ozdînç axaftina dawiyê kir û da zanîn ku ew li dijî tunehesibandinê bi hemû hêza xwe dixebitin.
Piştî axaftinan civîn bi dirûşmeya “Jin jiyan azadî” bi dawî bû.
