Şêniyên Şengalê kadroyên pêşeng ên PKKê Alî Haydar Kaytan û Riza Altun li Şengalê bi awayeke girseyî bibîranîn. Berdevka TAJÊ Riham Hico anî ziman ku îro ew li Şengalê bûbin xwedî statu bi xêra van cangoriyan e.
Meha Gulanê di Tevgera Azadiya Kurdistanê de weke meha şehîdan tê qebûlkirin. Şengaliyan pêşengên PKKê Alî Haydar Kaytan û Riza Altun li şehîdgeha Şehîd Dilgeş-Şehîd Berxwedan ya Serdeşta Çiyayê Şengalê bi merasîmekî bi bîr anîn. Di merasîmê de Heqî Karer û hemû şehîdên meha Gulanê jî hatin bîranîn.
Merasîm bi deqîqeyek rêzgirtinê dest pê kir. Beriya axaftin destpê bike, du dayîk bi navê girseyê mûm pêxistin. Piştî pêxistina mûman dirûşmeya, ‘Şehîd Namirin’ hatin bilindkirin. Li gorî nûçeya Rojnewsê parve kir, girseyek mezin beşdarî bîranînê bû. Berdevka Kordînasyona Jinên Êzidî (TAJÊ) Riham Hico di merasîmê de axivî. Riham Hico ewil şehîd Heqî Karer, Alî Haydar Kaytan û Riza Altun bibîranî û got: “Eger em îro li Şengalê bûne xwedî rêxistin, stratejî û hêza parastinê, bi saya van şehîda ye. Şehadet di nava vê tevgerê de xwedî wateyeke giranbûhaye. Êşa wê çiqas mezin be, serbilindahiya wê jî ewqase mezine. Me jî li ser vê axê gelek egîd û qehreman daye.”
Riham Hico kongreya PKKê ya 12emîn jî silav kir û got: “Em weke gelê Şengalê kongreya 12emîn ya PKKê li tevahî gelê Kurdistanê, li çar parçeyên Kurdistanê, li Rêber Apo, li tevahî endam û gerîlayên azadîyê pîroz dikin. Weke jin, ciwan, dayîk her biryarek ev rêxistin û Rêber Apo bide, baweriya me bi biryarên wan heye û piştgiriya xwe radigîhinin. Di encamnameya kongreya 12’emîn de biryara fesîxkirinê hate dayîn. Lê hate gotin, ev ne dawiye, ev destpêkirina pêvajoya avakirina civakeke demokratik, ferdekî azad bikin. Ev merheleyeke dîrokî û hesase. Yê ku rastiya PKKê fêmkiribe, wê bizane rihê PKKê ava kiriye, ne tenê li çar parçeyên Kurdistanê li çar aliyên cîhanê jî heye. Bandora Rêber Apo li ser hemû mirovahiyê û cîhanê jî heye.”
Riham Hico careke din kadroyên pêşeng yên PKKê Alî Haydar bibîrxist û got: “Rêhevalên Rêber Apo bûn. Ji bo azadiya civakê têkoşiyan. Me hevpeyvîneke heval Riza dît ku behsa rola Elewiyan dikir. Zimanê aştî û hezkirinê dixwest pêşbikeve. Em jî weke civaka Êzidî li Rojhilata Navîn xwedî rol û dîrokin. Ev merheleya PKKê daye destpêkirin roleke me ya girîng jî heye. Emê jî têkoşîna xwe ji bo avakirina civakeke demokratîk û komînal pêşbixin. Hevalê Fûat jî, rêhevalê destpêkê yê Rêber Apo û yek ji damezrînerê tevgerê bû. Mamosteyek bû. Me xwe bi fikrê wî perwerde dikir. Ji ber vêya xwedî derketina li keda van hevalan erka me ya serekeye.”
