Balafirên Bêmirov û Biçek ên Tirkiyeyê (SÎHA) gundê Um Hermel ê Zirganê bombebaran kir. Di encamê de ji malbatekê 3 kes hatin kuştin û 4 kes jî birîndar bûn.
Li gorî agahiyên ku nûçegihanê ANHAyê ji herêmê ragihandinê, balafirên bê mirov ên bi çek ên dewleta Tirk şevê din saet di 02.30an de li gundê Um Hermel ê bajarê Zirganê yê kantona Cizîrê malek bombebaran kir. Di encama bombebaranê de ji malbatekê zarokek û 2 kesên din jiyana xwe ji dest dan û 4 kes jî birîndar bûn. Navên şehîdan wiha ne: Îbrahîm Ubeyd El Siyad (50), Hisên Ubeyd El Siyad (35) û Cemîl Mihemed Deham El Siyad (zarok). Navên birîndaran jî wiha ne: Şehed Ubeyd El Siyad, Terfa Emo El Siyad, Hind Deham Selîmo, Sîham Deham El Siyad.
Artêşa Tirk di 27ê çile de jî zêdetirî 10 caran êrîşên hewayî û bejayî pêk anî 6 kes hatin kuştin.
Daneyên êrîşên duh ku ji nûçeyên ANHA û Rojnewsê hatin girtin wiha ne:
*Li gorî agahiyên ajansa me bi dest xistine, balafireke bêmirov a dewleta Tirk bajarê Eyn Îsyê yê Herêma Bakur û Rojhilatê Sûriyeyê bombebaran kir.
*Li gorî agahiyên çavkaniyan ji herêmê dane, balafirên şer ên dewleta Tirk gundên Tîna, Bîr Hiso, Xesiq û Sepet depoyên genim ên bajarê Sirînê yên girêdayî başûrê Kobanê bombebaran kirin.
*Balafireke bêmirov û biçek a dewleta Tirk li devera bajarokê Çiwarqurnê yê Raperînê wesayîteke sivîlan bombebaran kir. Hate zanîn ku di encama êrişê de 4 welatî hatin kuştin û welatiyek jî birîndar bû.
*Li gorî agahiyên ji herêmê hatine bidestxistin, balafireke bêmirov a dewleta Tirk gundê Um El Sehracî ê dikeve rojavayê bajarê Eyn Îsayê yê kantona Firatê bombebaran kir.
*Li gorî agahiyên hatine bidestxistin, derdora Bendava Tişrînê ya başûrê Kobanê bi balafirên şer ên dewleta Tirk hat bombebarankirin.
*Li gorî agahiyên ANHA bi dest xistine, artêşa tirk bi çekên giran gundên Saramide, Siwêdiyê, Mişêrfê, Hec Hesen û Taîs ên gundewarê rojhilatê bajarê Eyn Îsayê topbaran dikin.
*Li gorî agahiyên ku nûçegihanên ANHAyê ji herêmê ragihandine, dewleta tirk êrişî gundên El Gazlî, El Hewîcê û El Heco ên li başûrê bajarê Silûkê yê kantona Firatê kirin. Nûçegihanên ANHAyê diyar kir ku gundên navborî bi obîsan tên topbarankirin.
*Li gor Rojnewsê, balafirên şer ên dewleta Tirk bajaroka Dînarte ya ser bi Akrê bombebaran kirin. Di encama êrişê de 2 welatiyên ku hevjînên hevin jiyana xwe ji dest dan.
*Artêşa dewleta Tirk navenda bajarê Zirganê toparan kir. Li gorî agahiyan navenda bajar bi obîsan topbaran kirin. Li gundê Rebîatê yê di navbera Zirgan û Til Temirê de stasyona sotemeniyê topbaran kir.
