Li gorî agahiyên dawî û dîmenên ku ji aliyê şahidên rûdanê ve hatine parvekirin, li parêzgeha Îsfehanê ya Îranê piştî êrişên asîmanî dûmanên reş û mezin ber bi esman ve bilind dibin. Li gorî daneyên CENTCOM û IDFê ji şevê din ve bi dehan barefehên Îranê bûn hedefa wan.
Şerê Îsraîl-DYA û Îranê ligel nîqaşên agirbestê jî berdewam dikin. Piştî daxuyaniya Serokê DYEyê Donald Trump, Hêzên Hewayî yên Amerîka û Îsrailê operasyoneke berfireh li dijî binesaziya leşkerî ya Îranê dan destpêkirin. Hat ragihandin ku zêdetirî 70 firokeyên şer beşdarî vê pêla êrişê bûne û li gelek bajarên Îranê dengê teqînên mezin hatine bîstin.
CENTCOMê dîmenên nû parve kirin
Fermandariya Navendî ya Amerîkayê (CENTCOM) dîmenên nû yên dronên MQ-9 Reaper weşandin. Di dîmenan de tê xuyakirin ku dronên Reaper bi moşekên Hellfire yên bi lazer tên birêvebirin, pergala parastina hewayî û rampayên moşekên balîstîk ên Îranê ji nav dibin.
‘Îran êdî nikare bersiv bide’
Her wiha di daxuyaniye CENTCOMê de hate angaştin ku kapasîteya Îranê di astek jor de kêm bûye û êdî nikare di aliyê hewayî û deryayî de tu bersivan bide. Di daxuyaniyê hate ragihandin ku Îran êdî tenê dikare car car moşekên balîstîk bavêje lê ji ber ku rampe û demopên van moşekan di astek jor de hatine têkbirin, hejmara moşekan jî gelek kêm bûye.
Li Îsfehanê rewşa awarte
Parêzgeha Îsfehanê ku wekî navenda pîşesaziya berevaniyê û bernameya nûklîerî ya Îranê tê naskirin, di nava hedefên sereke de ye. Li gorî daxuyaniya IDFê di nava 24 saetên dawî de li seranserê Îranê zêdetirî 400 êrişên asîmanî hatine kirin û binesaziya lojîstîk a Supayê Pasdaran (IRGC) bi giranî hatiye rûxandin.
Zirarên giran û daxuyaniyên Tehranê
Her çend rayedarên Tehranê hewl didin ziraran kêm nîşan bidin jî, dîmenên ku Reutersê weşandine nîşan didin ku li kargehên hilberîna moşekan û depoyên çekan zirarên mezin çêbûne. Tê gotin ku ev operasyon ji bo şikandina kapasîteya êrişê ya Îranê ya li herêmê hatiye destpêkirin.
DYAyê li Mexmûrê li Haşdî Şabî da
Di vê navberê de êrişên DYA û Îsraîlê yên li dijî alîgirên Îranê li Libnan û Iraqê jî berdewam dikin. Di seatên piştî nîvro de baregeha Haşdî Şabî ya dikeve nêzîk navçeya Mexmûrê bi giranî hate bombebarankirin. Di encama bombebaranê de baregeh hate asta neyê bikaranîn. Derbarê windahiyên canî an jî birîndaran re agahiyên zelal nehatin bi destxistin.
