Ajansa Nûçeyan a Firatê (ANF) ku bi gelek zimanan weşana xwe didomîne, xebatên xwe yên ji bo zaravayê Hewramî temam kir. Êdî xwîner dikarin nûçeyên Kurdistan û cîhanê bi zaravayê Hewramî jî bişopînin.
Ajansa Nûçeyan a Firatê (ANF) ku di sala 2005an de dest bi weşanê kiribû, malbat û tora xwe ya ziman bêtir berfireh dike. ANF ku heta niha bi zimanên Tirkî, Îngilîzî, Almanî, Erebî, Farisî, Îspanyolî, Rusî û bi zaravayên Kurdî yên Kurmancî, Soranî, Kirmanckî weşan dikir, niha zaravayê Hewramî jî li servîsên xwe zêde kir.
Pencereyeke nû: Hewramî
ANFê ragihand ku xebatên teknîkî û edîtoryal ên ji bo zaravayê Hewramî bi serkeftî bi dawî bûne. Bi vê gavê re, xwînerên Hewramîaxêv êdî dikarin geşedanên li Kurdistan, Rojhilata Navîn û tevahiya cîhanê bi zaravayê xwe yê resen bişopînin.
Navnîşana servîsa Hewramî
Xwîner û şopînerên ku dixwazin servîsa nû ya ANFê bişopînin, dikarin li ser vê navnîşanê bigihîjin nûçeyan: hawrami.anf-news.com
Ev pêngava ANFê di dema ku têkoşîna ji bo parastin û pêşxistina ziman û zaravayên Kurdî di rojevê de ye, gaveke giring a medya Kurdî ye.
