Saziyên Elewî û rêxistinên demokratîk, bi boneya 89emîn salvegera Tevkujiya Dêrsimê, li bajarê Mainz ê Almanyayê çalakiyeke girseyî ya bîranînê qûrbaniyên terteleyê li dar dixin û daxwaza edaletê dikin.
Li bajarê Maînzê yê Almanyayê, amadekariyên çalakiyeke mezin a bîranînê ji bo qurbaniyên Tevkujiya Dêrsimê ya salên 1937-38an tên kirin. Federasyonên Elewiyan, saziyên Dêrsimî û rêxistinên demokratîk ên mîna AABF, FEDA û ADEFê bi daxuyaniyeke hevpar bang li hemû parêzvanên mafên mirovan kirin ku di 2yê Gulanê de li qada bîranînê bin.
Bi deh hezaran Kurd hatin qetilkirin
Di daxuyaniya saziyan de hat bibîrxistin ku bi biryara Lijneya Wezîran a 4ê Gulana 1937an operasyona leşkerî li ser Dêrsimê hate destpêkirin. Di daxuyaniyê de hat destnîşankirin ku di vê Roja Tarî an jî bi navê din Roza Saye de bi deh hezaran mirov hatin qetilkirin û bi hezaran jî hatin koçberkirin. Saziyan bal kişand ser karesata ‘keçên winda’ yên Dêrsimê ku ji malbatên wan hatibûn qutkirin û daxwaza eşkere kirina rastiyan dubare kirin.
Li dijî qirkirinê îradeyeke hevpar
Çalakiya bîranînê ji aliyê bêtirî 20 saziyên mîna DIK, AABK, Keyeya Cemî ya Maînzê, ATIF û AGIFê ve tê organîzekirin. Komîteya amadekar destnîşan kir ku ev bîranîn îradeyeke hevpar a li dijî polîtîkayên asimîlasyon û qirkirinê ye. Tê payîn ku di bernameyê de daxwazên mîna vekirina arşîvên Dêrsimê û eşkerekirina cihê gorên Seyîd Riza û hevalên wî werin ziman.
Dem û cihê bîranînê
Bîranîn wê di 2yê Gulana 2026an de, roja şemiyê saet di 14:30an de li Stadttheater Maînzê pêk bê. Di bernameyê de wê sînevîzyonek li ser şahidiyên zindî bê nîşandan û nûnerên saziyan peyamên xwe yên ji bo edaletê parve bikin.
