Stenbol – Dadgehê bi boneya tev li çalakiya “Nobeda Edaletê” bûne ceza li Cemîle Karakaş, Fincê Akman û Cemîle Çîftçî birî. Li her yekê 5 meh cezayê hepsê hate birîn. Dayikan diyar kirin ku gelek caran tevî ku ew bi îşkencekirinê hatin binçavkirin jî lê dîsa jî cezayê hepsê li wan hatiye birîn û gotin: “Em vî cezayî qebûl nakin. Bi vî cezayî dixwazin çavê me bitirsînin lê em natirsin. Sed caran ceza bidin jî em ê têbikoşin.”
Di sala 2022yan de li Stenbolê ji bo îşkence û zextên di girtîgehan de Kumrî Akgul, Fincê Akman, Gulsum Ozturk, Cemîle Çîftçî, Cemîle Karakaş û Zeynap Çalhan 11 mehan, her hefteyê tev li çalakiya “Nobeda Edaletê” ku dihat lidarxistin, bûbûn. Hema bêje her hefteyê dayikên navborî bi îşkencekirinê, hatibûn binçavkirin. Derheqê dayikan de doz hatibûn vekirin. Salek beriya niha 6 meh cezayê hepsê li Cemîle Karakaş, Fincê Akman û Cemîlê Çîftçî hatibû birîn.
Parêzar li dijî biryarê cezayê hatibû birîn, serî li dadgeha îstînafê dan û îstînafê ev ceza xira kir û ceza li dadgeha ku ceza birîbû vegerand. Di 13ê Gulanê de li Edliyeyê Anadolûyê Cemîle Karakaş, Fincê Akman û Cemîle Çîftçî ji nû ve hatin darizandin. Dadgehê carek din li her dayikekê 5 meh ceza birî. Parêzaran diyar kir ku ew ê dîsa li ber ceza rabin û serî li îstînafê bidin.
Cemîle Karakaş û Cemîle Çîftçî derbarê cezayê li wan hatiye birîn de axivîn.
‘Laçikê me ji serê me derdixistin û bi kelemçe me binçav dikirin’
Cemîle Karakaşê diyar kir ku kurê wê Xemgîn Karakaş li Girtîgeha Sîlîvriyê dihat ragirtin û wiha axivî: “Cezayê muebedê û 15 sal li kurê min hatiye birîn. Di girtîgehê de her roj îşkence li kurê min dikirin. Weke dayik min zilmê qebûl nekir. Ji bona wê di sala 2022yan de me dest bi çalakiya ‘Nobeda Edelatê’ kiribû. Ji bo cenazeyên zarokên me ji girtîgehan dernekevin me dest bi çalakiyê kiribû. Her roj agahiya îşkenceyê ji girtîgehan dihat. 11 mehan her hefteyê me çalakiya xwe li dar dixist. Gelek caran hê em di rê de bûn, me dikirin binçavan û îşkence li me dikirin. Laçikên me ji serê me derdixistin û bi kelemçeyê me binçav dikirin. Paşê doz li me hate vekirin. Di 13ê Gulanê de 5 meh ceza dan me. Sed caran ceza bidin me jî em ê ji bo zarokên xwe her dem têbikoşin. Em vê cezayî qebûl nakin.”
‘Bi lêdanê me binçav dikirin’
Cemîle Çîftçî jî anî ziman ku ev 29 sal in birayê wê Selîm Çîftçî tevî nexweşiya xwe jî di girtîgehê de ye û wiha got: “Birayê min nexweş e û di girtîgehê de nayê dermankirin. Em jî ji bo îşkence li wan nekin û birayê min nexweşxaneyê berî 4 sal me dest bi çalakiyê kir. Hefteyekê em çûn Emînonu hê em kom nebûn êrişî me kirin. Bi lêdanê me binçav dikirin û paşê jî doz vekirin. Di 13ê Gulanê de 5 meh cezayê hepsê dan me. Em dayik in, tu sûcê me tune ye. Ji bo zarokên xwe me çalakî li dar xist. Me dixwest bibêjin ‘îşkence li zarokên me nekin’ lê nedihiştin û me binçav dikirin. Em vî cezayî qebûl nakin.”
