Şaredariya Peyasê bi armanca xurtkirina aboriya herêmî û pêşxistina hilberîna kolektîf ji bo malbatên dahata wan kêm, komuna çandiniyê hat avakirin.
Li ser 20 donim erd, bi hevkariya malbatên dahata wan kêm, di nav sînorên Şaredariya Peyasê de, komuna çandiniyê hate damezrandin. Hevşaredarê Peyasê Cengîz Dundar, bi nûnerên Odeya Endezyarên Çandiniyê ya TMMOBê û saziyên sivîl ên bajêr re, di çarçoveya modela hilberîna hevgirtinê de şitlên firingî, îsot, bacan û xiyaran çandin.
Dê piştgiriyê bidin malbatên dahata wan kêm
Projeya ku li ser bingeha rêveberiya herêmî ya demokratîk, ekolojîk û azadiya jinan hatiye avakirin, armanc dike ku hilberînê li gorî ekosîstemê pêş bixe, ked û rola jinan di aboriyê de xuya bike û piştgiriyeke xurt bide aboriya malbatên dahata wan kêm ên li herêmên.
Dê çanda zibareyê ji nû ve zindî bikin
Malbatên beşdarî xebatên komînê dibin diyar kirin ku ew dixwazin çanda kevnar a hevgirtin û piştgiriya ya li Mezopotamyayê bi navên “zibare” û “hevkari” tê zanîn, ji nû ve zindî bikin. Wan got ku bi sîstema piştgiriya dualî ya li ser erdek 20 donimî, ew ê bi kedeke hevpar fêkiyên xwezayî hilberînin.
Dê ev proje bibe mînak
Dilxwazên alîkar û rêxistinên civakî piştgiriya avakirina komînê dikin. Beşdarên ku di projeyê de cih digirin, dibêjin ku ev însiyatîf di serdemeke ku nîqaşên li ser kooperatîvîzm û modelên hevparî yên hilberînê zêde bûne de, dê bibe îlham ji bo gelek projeyên din ên civakî.
Xebata çandiniyê ya komunal gaveke girîng e
Malbatan bang li hemû beşên civakî kirin ku ji çandiniyê bigire heta dirûnê bibin beşek ji vê hewldana kolektîf û bi kedê piştgiriyê bidin vê modela çandiniya xwezayî û hevgirtî. Ev xebata çandiniyê ya komînal weke gaveke girîng tê dîtin û alternatîfeke pratîkî ya li ser bingeha hevgirtin, ekolojî û wekheviya zayendî nîşan dide.
