Di danişîna doza Nîhat Kazan de dadgehê biryar da ku bultena sor a derbarê kujer de were înfazkirin.
Nihat Kazanhan ê 12 salî di 14ê Çileya 2015an de li navçeya Cizîrê ya Şirnexê ji aliyê polîsê tîmê taybet Mehmet Nûrbakî Goçmez ve hatibû kuştin. 11emîn danişîna doza Nihat Kazanhan li 1emîn Dadgeha Cezayê Giran a Edliyeyê Cizîrê hat lidarxistin. Dayik û bavê Nihat Kazanhan û parêzerên malbatê beşdarî danişînê bûn. Danişîn bi tespitkirina nasnameyê dest pê kir. Piştre bavê Nihat Kazanhan Mehmet Emîn Kazanhan axivî û got kurê wî bê sûc bû û xwest kujer bê cezakirin.
Piştrê jî dayika Nihat Kazanhan, Ayşe Kazanhan axivî. Ayşe Kazanhan jî da zanîn ku li gel bultena sor jî der barê kujer de heye lê dîsa jî nehatiye girtin û got: “Ez dixwazim cezayê giran li kujer were birîn. Kurê min bê sûc bû. Hûn dibêjin em ê bigirin lê hûn nagirin. Ew 10 sal in edalet pêk nehatiye. Bila qeydên HTSê bên tomarkirin. Helbet malbateke wî jî heye û bi malbata xwe re diaxive. Li ser malbatê jî hûn dikarin xwe bigihînin wî. Êdî bes e bila kujer bê dîtin. Bila zarokên din neyên kuştin.”
Parêzer Emîne Ozdemîr a ji Komîsyona Zarok û Jinan a Baroya Şirnexê parastinê kir û xwest ewrakên kêm ên dosyeyê bên temamkirin.
Piştî parastinan dozger daxwaza temamkirina ewraqên kêm kir û ji bo lêgerîna bultena sor jî biryrara înfazê xwest.
Pistrê jî şandeya dadgehê, biryara înfaza bultena sor û temamkirina ewraqên kêm da û danişînê taloqî 30yê Nîsanê kir.
