Amed – Welatiyên Amedê anîn ziman ku divê zêdekirina heqê rê bi paş ve werê kişandin, pêwist e şaredarî gelê xwe bifikire.
Li Amedê Navenda Koordînasyona Çûnehatê di 6ê Gulanê de li Şaredariya Bajarê Mezin a Amedê civiya. Piştî civînê heqê rê ji sedî 25 zêde kir. Heqê rê yê dolmîşan ji 20 lîreyî derxistin 25 lîreyî. Heqê rê ji bo xwendekaran jî ji 12 lîreyan derxistin 15 lîreyan. Heqê rê ji bo otobusên şaredariyê û Otobusên Gel ên Taybet jî hat bihakirin; ji bo otobusan heqê rê ji 15 lîreyan derxistin 20 lîreyan û ji bo xwendekaran jî ji 8 lîreyan derxistin 10 lîreyan. Welatiyên Amedê têkildarî bihabûna heqê rê nerazîbûnên xwe anîn ziman û diyar kirin ku gel xizan e nikare êdî li dolmîş û otobusan siwar bibe.
‘Em çar gav jî herin dê 25 lîre bistînin’
Welatiyên bi navê Xalid Demîr diyar kir ku gel zêde xizan bûye û wiha got: “Xwendekar wê çawa heqê rê bidin. Welatiyên feqîr wê çawa 25 lîre bidin? Rewş ne baş e, gelek biha ye. Em çar gav herin jî 25 lîre dê bixwazin. Ji malbatekê çar kes li dolmîşê siwar bibe 100 lîre dike û vegera wan jî 100 lîre, vaye bû 200 lîre. Mehê jî dike 6 hezar. Jixwe meaşê wan jî gelek kêm e. Divê şaredarî vê zemê bi paş ve bikişîne.”
‘Bila biryarê bi paş ve bikişînin’
Welatiyê bi navê Ramazan Guneş jî da zanîn ku her roj tiştek biha dibe û got: “Kes nikare debara xwe bike. Hêza gel tune ye. Ev ne baş e. Berê salê carekî zem dihat. Divê ev biryara zemê bi paş ve were kişandin. Kesên ku meaşa herî kêm werdigirin, wê çawa debara xwe bikin?”
‘Em êdî nikarin li dolmîş û otobusan jî siwar bibin’
Welatiyekî jî diyar kir ku ew îro li dolmîşê siwar bûyê û bihabûnê bihîstiye û wiha axivî: “Em êdî nikarin li dolmîş û otobusan jî siwar bibin. Yên ku ereba wan tune be wê çawa bikin? Divê vê rast bikin û vê biryarê bi paş ve bikişînin. Karek me derkeve êdî em nikarin li dolmîş û otobusan jî siwar bibin. Divê her kes hev bifikire.”
Welatiyên bi navê Tahsîn Çelîk jî diyar kir ku her roj her tişt biha dibe û xwest ku ew bihakirina heqê rê yê dolmîş û otobusan bi paş ve were kişandin.
