Amed – Rojên Pirtûkên Kurdî ku bi hevkariya Şaredariya Bajarê Mezin a Amedê û YEWKURDê li Qada Şêx Seîd a Amedê tê lidarxistin îro dest pê kirin.
Rojên Pirtûkên Kurdî ku bi hevkariya Şaredariya Bajarê Mezin a Amedê û Yekitiya Weşangerên Kurd (YEWKURD) di çarçoveya 15ê Gulanê Cejna Zimanê Kurdî de li Qada Şêx Seîd a li navçeya Yenîşehîr a Amedê tê lidarxistin îro bi daxuyaniyekê dest pê kirin. Hevşaredarê Bajarê Mezin ê Amedê Dogan Hatûn, Hevşaredara Yenîşehîrê Safiye Akdag, nivîskar, xwediyên weşanxaneyan di nav de gelek kes beşdarî daxuyaniyê bûn.
‘Xwedîderketina weşangeran xwedîderketina xwe bi xwe ye’
Di daxuyaniyê de ewilî Hevserokê YEWKURDê û xwediyê Weşanên Aramê Hakki Boltan axivî. Hakki Boltan Cejna Zimanê Kurdî pîroz kir û spasiyên xwe pêşkeşî kesên ku ji bo kurdî xebat dikin kir. Hakki Boltan qala xebatên YEWKURDê kir û wiha got: “Xwedîderketina weşangeran xwedîderketina xwe bi xwe ye. Em çiqas li pirtûkên kurdî xwedî derkevin ewqas xwedî li hebûna xwe derdikevin. Daxwaza gelê kurd fermîbûna zimanê wî ye.
‘Qedrê pirtûkên kurdî nayê zanîn’
Dû re Hevşaredara Yenîşehîrê Safiye Akdag axivî. Safiye Akdag bi lêv kir ku zimanê kurdî zimanekî hêja û birûmet e û Cejna Zimanê Kurdî pîroz kir. Safiye Akdag, destnîşan kir ku qedrê pirtûkên kurdî nayê zanîn û wiha got: “Divê berî her tiştî dê û bav bikaribin kurdî hînî zarokên xwe bike.”
‘Divê em li zimanê xwe xwedî derkevin’
Pişt re Hevşaredarê Bajarê Mezin ê Amedê Dogan Hatûn axivî. Dogan Hatûn spasiyên xwe ji weşanxaneyên kurdî re pêşkeş kir û wiha got: “Em ê li zimanê xwe xwedî derkevin. Îro li Qada Şêx Seîd hemû weşanger li cem hev in û li benda gel in. Nêzî 35 weşanxane hene, ji bo ziman yekitî avakirine. Xwestine zimanê me tu car ji holê ranebe. Ya ku dikeve li ser pişta me jî divê em weke gel xwedî li keda wan derkevin. Bi hezaran pirtûkên kurdî hatine nivîsîn, pêşkeşî gelê me hatine kirin. Hevalên me gelek aktîvîteyên cuda amade kirine. Di şeş rojan de 20 panel dê bên lidarxistin. Divê em di serî de li zimanê xwe xwedî derkevin.”
Dû re hevşaredar, xebatkarên Seroka Daîreya Karên Çand û Civakî ya Şaredariya Bajarê Mezin a Amedê û welatî li standên pirtûkan geriyan.
Pişt re Koma Peyla derket ser dikê û stranên xwe pêşkeşî girseyê kir. Koma Peyal bi stranên xwe gel coşand. Û gel li ber stranan govend gerand û tê ra dilê xwe keyf kirin.
