Amede – Şofêra Şaredariya Bajarê Mezin a Amedê Emel Menekşe Şen diyar kir ku 15 sal in şofêrtiyê dike û got: “Ev 20 roj in jî ez bi awayekî aktif li şaredariyê şofêrtiya otobosê dikim. Ez dixwazim ji hemû jinan re bibim mînak, bila zanibin ku di hundirê wan de cewhereke xurt heye.”
Şaredariya Bajarê Mezin a Amedê piştî 8 salên qeyûm carek din ragihand ku wan gelek şofêrên jin girtine kar û ev şofêrên jin otobusên veguhestina giştî diajon. Yek ji van şofêrên Şaredariya Bajarê Mezin a Amedê Emel Menekşe Şen li ser çîroka şofêrtiya xwe û armanca xwe ji Ajansa Welat re axivî. Emel Menekşe Şen diyar kir ku 15 sal in şofêrtiyê dike û got: “Ev 20 roj in jî ez bi awayekî aktif li şaredariyê şofêrtiya otobosê dikim. Ez dixwazim ji hemû jinan re bibim mînak, bila zanibin ku di hundirê wan de cewhereke xurt heye. Bila jin xwe bibînin, bila bizanibin ku em natirsin, em hene.”
‘Zor û zehmetî derbas dibin’
Emel Menekşe Şen da zanîn ku dema wê ji bo şofêrtiya otobosê serî lê daye heval û nasên wê piştgirî dane wê û wiha got: “Her kesî digot em ji te bawer dikin, hevjînê min, malbata min gişkan piştgirî dan min, piştgiriya wan nebûya belkî min nikaribûya wisa rehet derketama ser dîreksiyonê. Rêwî jî ji şofêrtiya min kêfxweş in û piştgirî didin min. Karekî zor e lê dema ku însan hez bike dikare van zor û zehmetiyan jî derbas bike.”
‘Jin dikarin her karî bikin’
Emel Menekşe Şen bi lêv kir ku cihê jinan her cih e û ev yek anîn ziman: “Ez wek dayikekî hem li zarokên xwe dinêrim hem jî vî karî dikim. Em dikarin hemû karan jî bikin, bila tu jin nebêje em nizanin, em nikarin. Heke jin hinekî wêrek bin dikarin her karî jî bikin.”
Dayik dema wan dibînin kêfxweş dibin
Menekşe Şenê kêfxweşiya xwe ya ji ber nêzikatiya welatiyan anî ziman û got: “ Taybetî dayik dema ku min li ser dîreksiyonê dibînin pirr pirr kêfxweş dibin, min pîroz dikin. Ev kêfxweşiya wan jî hin zêdetir bi cesaretê dide min, dike ku zêdetir kêfa me ji karê me re bê. Hejmara me şofêrên jin bi giştî 12 ye, ez hêvîdar im em ê zêdetir jî bibin.”
