Desteya Serokatiyê ya MSDê di civîna xwe ya asayî de awayên çalakkirina pêvajoya siyasî li Sûriyeyê gotûbêj kirin. MSDê banga destpêkirina diyalogeke berfireh ji bo pêkanîna hevkarî û edaletê kir.
Desteya Serokatiyê ya Meclisa Sûriyeya Demokratîk (MSD) civîna xwe ya asayî li Hesekê li dar xist. Hevserokên MSDê Leyla Qereman û Mehmûd El Muslit bi rêya vîdeoyê û hevseroka Daîreya Têkiliyên Derve ya Rêveberiya Xweser Îlham Ehmed û endamên meclisê beşdar bûn.
Di civînê de pêşketinên siyasî yên li Sûriyeyê hatin gotûbêjkirin. Leyla Qereman di axaftina xwe de diyar kir ku pêvajoya derbasbûnê li şûna vekirina rêyên çareseriyê, bûye egera aloziyê û got: “Paşguhkirin gelan nake yek û tundî dewletekê ava nake. Ya ku îro tê xwestin, destpêkirina projeyeke neteweyî ya berfireh li ser bingeha hevkariyê ye.”
Leyla Qereman derbarê bûyerên dawîn ên li Siwêdayê de jî daxwaza lêpirsîneke serbixwe kir, bi taybet yên li dijî jin û zarokan û got: “Divê bingeha avakirina Sûriyeyeke nû edalet be.”
‘Divê hemû pêkhate cihê xwe bigirin’
Hevseroka Daîreya Têkiliyên Derve ya Rêveberiya Xweser Îlham Ehmed jî diyar kir ku nenavendîkirin êdî vebijêrkek nîn e, lê pêdivîyek e. Îlham Ehmed da zanîn ku her çareseriyeke siyasî bêyî tevlibûna rastîn a hemû pêkhateyên Sûriyeyê, dê tenê bibe sedema alozî û hilweşînê.”
Di dawiya civînê de, Desteya Serokatiya MSDê daxwaza pêkanîna peymana 10ê Adarê ya di navbera Hêzên Sûriyeya Demokratîk û hikûmeta demkî ya Şamê de kir. Her wiha xwest diyalogeke berfireh çêbe ku hemû alî û pêkhateyên siyasî, civakî, etnîk û olî di cihê xwe tê de bigirin.
Her wiha MSDê da zanîn ku ew ê xebata ji bo Sûriyeyeke dadmend û sivîl ku xwestekên gelê Sûriyeyê vediguherîne rastiyeke berbiçav, bidomîne.
