Amed – Koma Amed piştî 30 salan li bajarê Amedê konserekê li dar dixe. Koma Amed li Stenbolê dest bi amadekarî ango provaya konserê kir. Li bendê ye ku bi deh hezaran kes tev li konserê bibin.
Koma Amed piştî 30 salan li Amedê dê roja Şemiyê (25ê Cotmehê) konserekê li dar bixe. Konser wê li Qada Newrozê ya Amedê pêk were. Koma Amed yek ji komên kevntirîn ên Navenda Çanda Mezopotamyayê ye. Koma Amed piştî ku li Ewropa dest bi konseran kir vê carê berê xwe dide bakurê Kurdistanê. Konser dê bi dirûşma “Kulilkên Azadiyê Pêşwaziya Aştiya Civakî Dikin” were lidarxistin.
Amadekarî didomin
Konser bi hevkariya Sanatça Organîzasyon, Şaredariya Bajarê Mezin a Amedê û Şaredariya Peyasê tê lidarxistin. Ji bo konsere li Amedê amadekarî berdewam dikin. Li gelek bîlboardên li navenda bajêr afîşên konserê hatine bicihkirin û gel ji bo konserê tê vexwendin. Li bendê ye ku bi deh hezaran kes tev li konserê bibe. Tê payîn ji bajarên derdorê jî muzîkhez werin şahiyê. Koma Amed xwe ji bo hejandina bajarê bîr û evînê amade dike.
Provaya konserê dest pê kir
Endamên komê Suleyman, Serhad, Memo Gul û Serap hatin Stenbolê û dest bi provaya konserê kirin e. Koma Amed û orkestraya xwe li studyoyek Stenbolê ev çend roj in amadekariyên konserê dikin. Li ser stranan dixebitin û bi baldarî dixebitin. Kom wê stranên ji hev xweştir li Amedê derkeve pêşberî gel.
Dê li Amedstore formayan îmze bikin
Endamên komê dê roja 23yê Cotmehê biçin Amedstore ya nêzî stadyûmê. Hunermend dê li vir merasîma îmzekirina formayan li dar bixin û bi hezkiriyên xwe re bicivin.
Dîrokçeya Koma Amed
Kom, sala 1988an ji aliyê xwendekarên Fakulteyên Tibê yên Zanîngehên Enqere û Hacettepeyê ve hat damezrandin.
Di nav endamên destpêkê yên komê de Evdilmelîk Şêxbekir, Gulşen Çetîn, Savaş Çakmak, Rohat Kutlay, Fikrî Kutlay, Mustafa Kart û Ahmet Kaya hebûn.
Albuma yekem sala 1990î bi navê “Kulîlka Azadî” derket û dengvedanek mezin li pey xwe anî.
Yek ji endamên destpêkê yên komê Evdilmelîk Şêxbekir, ji bo avakirina Navenda Çanda Mezopotamyayê (NÇM) jî kedeke mezin da.
Evdilmelîk Şêxbekir, Îlona 1991ê tevl li PKKê bû û sala 1992yan jiyana xwe ji dest da.
Komê paşê bi beşdariya gelek hunermendên din xebatên xwe domand lê hinek endamên komê piştî albuma “Dergûş” a sala 1997an ji ber sedemên siyasî neçar man ku koçberî welatên Ewropayê bibin.
Albumên komê ev in: Kulîlka Azadî (1990), Agir û Mirov (1995), Dergûş (1997-98).
