Dayîka Aştiyê Meyreme Tura da zanîn ku ew wek dayîkên aştiyê dixwazin biçin girava Îmraliyê û wiha got “Em dixwazin bi Rêberê Gelê Kurd Abdullah Ocalan re hevdîtinek pêk bînin û li ser pêvajoyê bi hev re bicivin.”
Meclîsa Dayikên Aştiyê di 18-19ê Cotmehê de bi dirûşma “Dayîk pêşengên civaka demokratîk û aştiya mayînde ne” li Amedê konferansa xwe ya 3yemîn li dar xistibûn. Di encannameya konferansê de dayîkan diyar kiribû ku Dayikên Aştiyê dixwazin demildest azadiya fizîkî ya Abdullah Ocalan pêk were û xwestin ku li Girava Îmraliyê bi Rêberê Gelê Kurd Abdullah Ocalan re hevdîtinê bikin û li ser aştiyê biaxivin û civakeke demokratîk ava bikin. Endama Meclîsa Dayikên Aştiyê ya Amedê Meyreme Tura têkildarî daxwaza dayîken aştiyê ya ku dixwazin biçin cem Rêberê Gelê Kurd Abdullah Ocalan axivî.
‘Gotinên me dayîkan jî hene em bi serokê xwe re parve bikin’
Meyreme Tura da zanîn ku di konferansa dayîkan ya 3yemîn de xwesteka dayîkan ew bû ku dayîk bi Rêberê Gelê Kurd re hevdîtinek pêk bînin û wiha got: “Me konferasna xwe ya 3yemîn ya dayîkan pêk anî. Dayîkan di konferansê de anîn ziman ku divê demildest em biçin li cem Rêberê Gelê Kurd Abdullah Ocalan û pêre hevdîtinekê pêk bînin. Me ji xwe carekî serî li Komeleya Mafên Mirovan (ÎHD)ê dabû ku em biçine Girava Îmraliyê. Gotinên me dayîkan jî hene ku em bi serokê xwe re parve bikin. Em ê jî li pêşniyar û nêrînên wî guhdar bikin. Em dixwazin li gel serokê xwe pêvajoya Aştî û Cîvaka Demokratîk binirxînîn. Em bang li dewletê dikin ku bila gavan biavêje.”
‘Em dibêjin aştî û azadî’
Meyreme Tura li ser gav neavêtina dewlet-dethilatê anî ziman ku divê demildest dewlet gavên şênber biavêje û wiha axivî: “Ji aliyê dewletê ve hê tu gav nehatiye avêtin. Kongre hat lidarxistin, çek hatin şewitandin û gavên şênber ji aliyê Kurdan ve hatin avêtin. Lê ev nêzî salekê ye bi ser pêvajoyê re derbas bû hê tu gav ji aliyê dewletê ve nehatine avêtin. Çima dewlet zindanan vala nake û girtiyên me bernade. Em dixwazin li ser vê mijarê biçin bi Rêberê Gelê Kurd Abdullah Ocalan re biaxivin. Divê her yek ji me bibe mertalên avakirina aştî û civaka demokratîk. Me serî netewand, em ê netewînin û wê têkoşîna me bidome. Me dayikan çiqas bedelên giran dabîn jî lê dîsa em dibêjin aştî û azadî.”
