Rêyên bi sedan gundên bi ser navçeyên Amedê ve ji ber berfê rê girtî ne. Şaredariya Bajarê Mezin a Amedê got ku xebatên vekirina rêyên gundan didomin.
Li bajarê Amedê bênavber 2 rojan berfê lê kir û şert û mercên jiyan ango zivistanê dijwar kir. Duh bi şev lêkirina berfê sekinî û cihê xwe ji hewaya sayî re berda. Piştî hewaya sayî ser berfê qeşa girt û çûnehatê hin bêtir zehmet kir. Berfê bandorek neyînî li çûnehatê kir. Ji ber berfê rê û cadeyên li navenda Amedê jî hatin girtin.
Ev yek jî bu sedema şemitînê û gelek qeza çêdibin û qeza jî dibin sedemên xesarên madî. Şaredariya Bajarê Mezin a Amedê di nav van çend rojan de li navendê hewl dide ku rê û cadeyan vebike û paqij bike. Tîmên şaredariyê xebatên xwe bê navber didomînin. Her wiha rêyên bi sedan gundên bi ser 17 navçeyên Amedê ve jî ji ber berfê hatine girtin.
Şaredariya Bajarê Mezin a Amedê bi tevî şaredariyên navçeyan ve hewl dide ku xwe bigihînin wan gundan û rêyan hemû vekin. Şaredariyê got ku hewldana wan ew e ku rêyan vekin û welatî zehmetî û zorê nekişînin û xebata vekirina rêya gundan didome.
