Şîna ji bo mamosteyê Çapemeniya Azad rojnameger û nivîskar Huseyîn Aykol ku li Şaxa ÎHDê ya Enqereyê hatibû danîn di roja duyemîn de didome. Hevserokê Giştî yê DEM Partiyê Tuncer Bakirhan û heyeta pê re jî serdana şînê kir.
Mamosteyê Çapemeniya Azad Huseyîn Aykol ku di 14ê Cotmeha 2025an de li mala xwe ya Enqereyê xwîn çûbû ser mejiyê wî û ji wê rojê û vir ve li nexweşxaneyê dihat tedawîkirin, şeva sersalê jiyana xwe ji dest da û duh li Goristana Karşiyakayê ya Enqereyê hate veşartin. Ji bo Huseyîn Aykol li Şaxa Komeleya Mafê Mirovan (ÎHD) a Enqereyê şîn hat danîn. Şîn di roja duyemîn de didome. Malbat û hevalên Aykol di şînê de amade ne û mêvanan pêşwazî dikin.
Li cihê serdana şînê pankarta li ser wêneyê Huseyîn Aykol hebû û li ser “Çinarê şoreşger ê çapemeniyê” dinivisî hat daliqandin. Her wiha wêneyê Huseyîn Aykol, rojnameya Yenî Yaşamê jî li cihê şînê hatin danîn. Her wiha derdora wêne û rojnameyê jî bi qerenfîlan hat xemilandin. Nameyên ji girtîgehan ji bo Huseyîn Aykol hatibûn şandin jî li ser masayê hatin danîn. Li cihê şînê lenûskek jî hat danîn û kesên serdana şînê dikin derbarê Huseyîn Aykol de fikir û hestên xwe dinivisînin.
Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan, Cigirê Serokê Giştî yê DEM Partî Tayyîp Temel, parlamenterên DEM Partî û endam û nûnerên partiyên siyasî, saziyên sivîl û gelek kesan serdana şînê kir.
