Rêberê Gelê Kurd Abdullah Ocalan di girtekên hevdîtina Komîsyona Meclîsê de balê dikişîne ser entegreya Civaka Demokratîk û Komarê û dibêje: “Divê Civaka Demokratîk û Komar entegre bibe. Tirkbûna Anatoliyê girêdayî Kurdbûnê ye, Kurdbûna Mezopotamyayê jî girêdayî Anatoliyê ye.”
Rêberê Gelê Kurd Abdullah Ocalan di girtekên hevdîtina bi Komîsyona Meclîsê re balê dikişîne ser girîngiya komîn, entegrasyon û demokratîkbûnê û wiha dibêje: “Koka Komînê bi Kurdî ye, tê wateya civak, kombûnê, di Serdema Navîn de tê wateya şaredarvaniyê, şaredarvaniya gel, şîrketbûn, demokrasiya herêmî ye, ji bo Tirkiyeyê jî vê pêşniyar dikim.”
Rêberê Gelê Kurd Abdullah Ocalan destnîşan dike ku ya ji bo Tirkiyeyê dixwaze ji bo Sûriyeyê jî dixwaze û dibêje: “Ev yek demokrasiya herêmî û komîn (şaredarvaniya demokratîk) e. Vê mijarê her roj difikirim. Di vê çarçoveyê de bi wan re (HSD) dê diyalogê saz bike. Difikirim ku dê ew jî guhdariya min bikin lê belê dê bi yek alî tevnegerin. Divê Ahmed el-Şara jî wekî HSDê ji bo Sûriyeya demokratîk gavan biavêje.”
Abdullah Ocalan diyar dike ku belasebep dîrokê venabêje û wiha berdewam dike: “Li Sûriyeyê netewperestiyeke giran a Ereban heye. Li wê derê Tirkmen jî hene, dê HSD wekî Kurdan heqê wan berçav bigirin. Di mijara Sûriyeyê de 8 xalên Peymana 10ê Adarê hene, ew ê van esas bigirin.”
Abdullah Ocalan herî dawî balê dikişîne ser têkiliya Anatoliya û Mezopotamyayê û wiha dibêje: “Tirkbûna Anatoliyê girêdayî Kurdbûnê ye, Kurdbûna Mezopotamyayê jî girêdayî Anatoliyê ye. Kurd û Tirk, hezar sal in di nav hev de dijîn. Tirkmenên Karakeçîlî yên li Rihayê ji min bêtir Kurd in. Germiyaogullari di eslê xwe de Kurd in, di nava demê de bûne Tirk. Divê ev rastiya dîrokî li ber çavan were girtin. Pêwîst e her du nasname jî li hemberî hev rêz bigirin. Heke hevdu tune bihesibînin, dikevin xefikê. Ev xefikek e.”
