Piştgiriya xelkê Başûrê Kurdistanê ya ji bo Rojavayê Kurdistanê her ku diçe berfireh dibe. Du eşîrên bi navên Terxanî û Zend bi daxuyaniyan piştgiriya xwe ji bo berxwedaniya xelkê Rojava ragihandin.
Her ku diçe piştgiriya gel û beşên cûda yên Başûrê Kurdistanê ya ji bo Rojavayê Kurdistanê berfirehtir dibe. Li gorî nûçeya RojNewsê, di vê çarçoveyê de du eşîrên mezin yên Başûr ên bi navên Terxanî û Zend bi daxuyaniyan piştgiriya xwe ya ji bo Rojava anîn ziman.
‘Dilê me bi xweşk û birayên me re ye’
Serokê Eşîra Zend Îzamedîn Kuxe Mihemed, da zanîn ku ew wek binemalek yekgirtî di wê baweriyê de ye ku tu sînor di nava Kurdistanê de nîne û got: “Hest û heskirin ji Rojhilat ji bo Rojava. Dilê me ji bo piştgiriya xwişk û birayên me lêdide ku ew ji bo azadî, rêz û jiyanek baş têdikoşin.”
Îzamedîn Kuxe Mihemed da zanîn ku piştgiriya Kurdên Rojava ne tenê helwestek siyasiye û got: “Ev berpirsyartiyek mirovî û nîşaneya yekgirtinê ye. Ger Kurdek êş bibîne em hemû diêşin, ger Kurdek serkeftîbe em hemû serkeftîne.”
Serokê Eşîra Zend Îzamedîn Kuxe Mihemed got: “Em wek eşîra Zend piştgiriya xwe ji bo Rojava dubare dikin, emê heta dawiyê li gel Rojava bin.”
‘Hewldanên dijminan nikare me tine bike’
Eşîra Terxanî ya ser hoza Caf jî peyamek piştgiriyê ji bo Rojava parve kir û got: “Em piştgiriya xwe ji bo birayên xwe yên Rojavayê Kurdistanê radigihînin. Em dubare dikin ku her hewldanek tirsonek û sernekeftî ya dijminan wê nikaribe ruhê hevrebûn û netewîbûna me tine bike. Wek hercarê em xwe bi pêşengê hemû şoreşek û qurbaniyan dibînin.”
Hêjayî bibîrxistinê ye di rojên dawî de gelek serok eşîr û kesayetên ji beşên cûda yên Başûrê Kurdistanê piştgiriya xwe ya bi şervan û gelê Rojavayê Kurdistanê re nîşan dan û amadebûna xwe ji bo alîkariya bi Rojava re anîne ziman.
