Êrîşên li ser Rojavayê Kurdistanê li Ermenîstanê hatin protestokirin. Li Almanya jî Êzidî ji bo piştgiriya Rojavayê Kurdistanê meşiyan û konê alîkariyê vedan.
Kurdên li Ermenistanê bi armanca şermezarkirina êrişên li ser Rojavayê Kurdistanê li herêma Almavirê daxuyaniyek dan çapemeniyê. Di daxuyaniyê de Hevserokê Komîteya Kurdistanê Silo Dirboyan û Kurdistaniyê bi navê Mîlo Kelaşyan axivîn. Silo Dirboyan balkişand ser êrişan û wiha got: “Carek din gelê me dikin qurbanê polîtîkayên xwe yên qirêj û dixwazin bê Kurdan, Rojhilata Navîn dîzayn bikin. Em wek gelê Kurd bang li hêzên navnetewî dikin ku êdî komploya li ser gelê me bi dawî bikin. Rojava bi tenê nîne, em hemû li pişta berxwedan û têkoşîna Rojava ne.”
Mîlo Kelaşyan jî diyar kir ku Kurd yekin û wiha axivî: “Em Kurd hemû yek in, dijmin ji hêz û hebûna me ditirse. Bi sedan sal in hemû rêbazên dermirovî li hemberî me bi kar anîn lê bi ser neketin.” Daxuyanî bi diruşmên, “Yek yek gelê Kurd yek”, “Bijî berxwedan Rojava”, “Şehîd namirin”, “Jin jiyan azadî” û “Bijî Serok Apo” bi dawî bû.
‘Êzidî li rex Rojava ne’
Li bajarê Bîelefeld ê Elmanyayê di pêşengtiya Meclîsa Êzidiyan (NAV-YEK) û SMJÊyê de bi armanca piştgiriya ji Rojava meşek hate lidarxistin. Gelek Kurdistanî û dostên wan beşdarî meşê bûn. Hevseroka NAV-YEKê Sosin Kartal diyar kir ku gelê Êzidî li rex Rojava ye û dê çalakiyên xwe bênavber bidomînin. Meşê, li pêşiya Bielefeld Hauptbahnhofê dest pê kir û li Kobanêplatzê bi dawî bû. Li ser navê girseyê melayê Mizgefta Şêx Saîd a li herêmê Mele Abdulloyê Rojavayî êriş şermezarkirin û wiha axivî: “Em ji bo ku xwîn neyê rijandin têdikoşin, em alîgirên aşitiyê ne. Em şehîdan bi rêzdarî bi bîr tînin û piştevaniya Rojava dikin.’’ Çalakî bi slogan, çepik û sirûda neteweyî bi dawî bû.
Ji bo Rojava konê alîkariyê hat vedan
Li bajarê Bielefeld a Elmanya, Înîsiyatîfa Aştî û Hêvî (Initiative Frieden und Hoffnung) ji ber êrîş û dorpêça li ser Rojava kampanyayeke alîkariya mirovî ya lezgîn da destpêkirin. Konê alîkariyê yê li navenda bajêr hatibû danîn, rastî eleqeyek mezin a welatiyan hat. Înîsiyatîfê, ragihand ku alîkariya berhevkirî dê radestî saziyên herêmî yên li Rojava were kirin. Di daxuyaniyê de, hate diyar kirin ku sivîl, zarok û malbatên koçber bi taybetî di şert û mercên zivistanê de bi pirsgirêkên mirovî yên cidî re rû bi rû ne.
Hat diyarkirin ku kampanyaya ku her sal di çarçoveya 1ê Mijdarê Roja Kobanê ya Cîhanî de tê lidarxistin, îsal ji ber êrîşên berdewam hatiye dirêjkirin û veguheriye seferberiyeke alîkariyê ya berfireh ji bo piştgiriya Rojava.
