Şirnex – Gelê Şirnexê tevî rêxistinên DEM Partî, DBP û TJAyê li Şirnexê bi boneya salvegera komploya navdewletî ya li dijî Rêberê PKKê Abdullah Ocalan meşa girseyî li dar xist.
Rêxistinên Partiya Herêmên Demokratik (DBP), Partiya Wekhevî û Demokrasiyê ya Gelan (DEM Partî) ên Şirnexê û Tevgera Jinên Azad (TJA), bi boneya salvegera komploya navneteweyî ya li dijî Rêberê PKKê Abdullah Ocalan daxuyanî dan. Meclîsa Dayikên Aştiyê, parlamentera DEM Partî Newroz Uysal Aslan û gelek kes tevlî daxuyaniyê bûn. Girseyê ji kolana sûkê ya Şirnexê heta Qada Omer Kabak meş li dar xist. Girseya ku pankarta li ser, “Em ê roja reş veguherînin roja azadiyê” dinivisî hilgirt û bênavber heta Qada Omer Kabak dirûşmeyên, “Bimre komployê 15ê Sibatê”, “Bijî berxwedana zindanan”, “Bijî berxwedana Tişrînê”, “Jin jiyan azadî” û “Berxwedan jiyanê” berz kirin.
‘Xwedîderketina vê îradeyê berpirsyarî û peywireke dîrokî ye’
Hevserokê DEM Parti ya navçeya navendî Selahattin Barinc li vir daxuyanî da û wiha got: “Rêberê PKKê Abdullah Ocalan piştî hatiye girtin bi pêşxistina paradîgmaya nû armanca komployê ya dewletên navneteweyî vala derxistiye. “Birêz Ocalan bi nexşerê û îradeya xwe ya çareseriyê ve ji bo pêşerojeke azad û demokratîk firsendeke dîrokî ye. Xwedîderketina vê îradeyê jî berpirsyarî û peywireke dîrokî ye. Divê ev peywir bibe rojeva esasî ya siyaset û civakê. Di heman demê de di serî de gele kurd û gelên azadî û demokrasîxwaz em bang li tevahiya gelan dikin; hêzên komploger 26 sal beriya niha roja 15ê Sibatê ji gelan re kirin ’Roja Reş’ Lê, divê ev taritî êdî parçe bibe. Divê roj bibe roja azadiyê. Werin em bi hev re li hemû kolan û qadan azadiya Birêz Ocalan bînin ziman. Divê di 26mîn salvegera wê de roja 15ê Sibatê di şexsê Birêz Ocalan de bibe Roja azadiyê.”
‘Heta azadiyê têkoşîna me wê bidome’
Piştî daxuyaniyê parlamentera DEM Partî Newroz Uysal Aslan axivî. Newroz Uysal Aslan bi lêv kir ku komplo bi binpêkirina hiqûqên navneteweyî pêkhatiyê û ev tişt gotin: “Hêzên ku komployê de cih girtinê îro jî di şerê Rojhilata Navîn de bi hişmendiya komployê tevdigerin. Li wê deme çawa ku di şexse birêz Ocalan de nenaskirina gelê kurd hebû niha jî heman nenaskirin berdewam dike. Şoreşa Rojava li dijî komployê bersiva heri mezin e. Cihe ku Komlo pek hatiyê û xwestin kurdan bi fetisinin cihe îro pergala netewa demokratîk bi felsefeya birêz Ocalan hatiyê rûnistandin. Hêzên komploger ne li Sûriye û ne jî li Gireva Îmraliyê bi serneketin. Birêz Ocalan bi helwesta xwe komplo vala derxist. Gelê ku digot hûn nikarin roja me tarî bikin dîsa li ber xwe didin. Yên ku winda kirinê hêzên komploger in. Tecrid û êriş berdewam dike. Lê têkoşîna me jî didome. Ew nîqaşên meha dawî jî nîşana vê berxwedanê ye. Em dixwazin ew hevdîtin ne li ser hişmendiya komployê, li ser nirxên mirovî pêşbikeve. Guh û dilê me li Îmraliyê ye. Em di daxwaza azadiya fizîkî ya birêz Ocalan û gelê kurd de bi israrin. Heta azadiyê têkoşîna me dê bidome.”
Daxuyanî bi çepik û dirûşmeyan bi dawî bû.
