Înîsiyatîfa Yekîtiya Demokratîk daxuyand ku heta êrîşên li Rojava radiwestin û dorpêça li ser Kobanê bişikê ew ê li ser piyan bin û got: “Ezmûna Rojava, ji bo gelê Kurd çîrûska yekîtiya neteweyî ye.”
Înîsiyatîfa Yekîtiya Demokratîk têkildarî peymana HSD û Şamê de daxuyaniyek nivîskî da. Înîsiyatîfê diyar kir ku gelê Kurd li dijî êrîşên li ser Rojava li çar aliyê Kurdistanê û li dîasporayê bi rojan e li ser piyan e û wiha got: “Berxwedana Rojava û xwepêşandanên milyonan nîşan da ku gelê Kurd êrişên li Rojava wekî êrişên li dijî hebûna xwe dibîne. Gelê me yê Rojava bi berxwedana ya bêhampa dengê xwe li hemû cîhanê da bihîstin. Em jî cardin berxwedana wan a rûmetdar silav dikin û destnîşan dikin ku li dijî êrîşan xweparastin ji bo man û nemanê mafê her neteweyekî yê rewa û demokratîk e.”
‘Pêdiviya herî girîng makezagoneke demokratîk e’
Di daxuyaniyê de hat destnîşankirin ku piştî pevçûn û aloziyan, bi lihevkirina Hêzên Sûriya Demokratîk û hikumeta demkî ya Şamê dê li Sûriyeyê qonaxeke nû dest pê bike. û wiha domand: “Em peymana HSD û Şamê bi erênî pêşwazî dikin û ji bo parastina gelan û pejirandina mafên neteweyî wekî destpêk dibînin. Hêviya me ew e ku li Sûriyeyê rewşeke aştiyê ya mayînde were avakirin û hemû pirsgirêk bi rêya dîyalogê werin çareserkirin. Lê em dixwazin bi bîr bixin ku piştî aştiyeke mayînde, pêdiviya herî girîng demildest makezagoneke demokratîk e. Misogeriya mafên hemû netewe û baweriyan ancax bi makezagoneke demokratîk û pirralî pêkan e. Lewre ji perwerdehiya bi zimanê zikmakî heta parastina komên olî, ji rêzgirtina mafên jinan heta rêvebiriyên herêmî, divê hemû mafên rewa bi awayekî xurt werin parastin.
‘Rojava çirûska yekîtiya neteweyî ye’
Daxuyanî wiha bi dawî bû: “Heta êrîşên li Rojava radiwestin û dorpêça li ser Kobanê bişikê em ê li ser piyan bin û heta mafên rewa yên gelê Kurd bi makezagoneke demokratîk tên pejirandin em ê bi gelê xwe yê Rojava re di nava piştevaniyeke xurttir de bin. Di vê çarçoveyê de em dîsa di serî de gelê Kurd, hemû gelên aştîxwaz û azadîxwaz vedixwînin ku xwedî li vina azadiyê ya Rojava derkevin. Lewre ezmûna Rojava, ji bo gelê Kurd çîrûska yekîtiya neteweyî ye û di heman demê de li Rojhilata Navîn ji bo hemû gelan modeleke berbiçav e.”
