Hevserokê Giştî yên DBPê Keskîn Bayindir di meşa ji bo Rojava û Mafê Hêviyê de axivî, diyar kir ku meseleya Kurd teslîmî du şewirmendan hatiye kirin û got: “Çawa ku meseleya Kurd bi dehan desthilat têk biriye, dê van şewirmendan jî têk bibe.”
Platfomra Saziyên Demokratîk a Bedlîsê, ji bo “mafê hêviyê” yê Rêberê Gelê Kurd Abdullah Ocalan û piştgiriya Rojavayê Kurdistanê, li navçeya Norşînê meşek li dar xist û piştî meşê daxuyanî da. Di meşê de pankartên “Rojava rûmeta me ye” û “Jin, Jiyan, Azadî” hatin vekirin û dirûşmên “Bijî berxwedana Rojava”, “Rojava Rojhilat e Kurdistan yek welat e”, “Jin jiyan azadî”, “Bijî Serok Apo” û “Bijî yekitiya gelê Kurd”hatin berzkirin. Hevserokê Giştî yê Partiya Herêmên Demokratîk (DBP) Keskîn Bayindir, pêkhateyên Platforma Saziyên Demokratîk, nûnerên partiyên siyasî û saziyên demokratîk ên bajêr, parlementer û welatî tevlî daxuyanî û meşa li Parka Roboskî ya li navenda navçeyê hatiye lidarxistin.
‘Yekitiya Kurdan plana navneteweyî têk bir’
Girse ji Parka Roboskî heta avahiya DEM Partiyê ya Norşînê meş li dar xist. Hevserokê Giştî yê DBPê Keskîn Bayindir di meşê de axivî û diyar kir ku gelê Kurd bi rojan e ji bo piştgiriya gel û xwîşk û birayên xwe yên li Rojava li her derê welat li kolanan li ber xwe didin û got: “Em li hemberî êrişên HTŞê û DAIŞê, welat, ax, hebûn, statû û zimanê xwe diparêzin. 60 milyon Kurd ev bi rojan e bi yek dengî ji bo Rojava li ser pêyan e, bijî yekitiya gelê Kurd. Bi têkoşîn û berxwedana dîrokî li çar aliyê welat û cîhanê Kurd ji şereke mezin û xetere xelas bûn. Planeke navneteweyî û herêmî li dijî Kurdan hat meşandin, lê yekitiya gelê Kurd û Rêzdar Ocalan ev plan têk bir. Bi pêşengtiya Rêberê Gelê Kurd niha em li ser maseyê ne. Lê hêj talûkeyeke mezin li ser Rojava heye û dorpêça li ser Kobanê jî hêj didome. Tenê ne HTŞ, Turkiye jî şîrikê vê dorpêçê ye. Miletê Kurd 25 TIRên alîkariyê amade kirin, lê nehiştin ev TIR biçin Kobanê. Ev siyaset û biratiyeke gelek qirêj e. Heke siyaseta we ne qirêj be, heke hûn mafên Kurdan qebûl bikin, deriyê Mûrşîtpinarê vekin. Lê em êdî we baş dinasin, zarokê 7 salî jî dinase.”
Bang li alim û seydayên Kurd kir
Keskîn Bayindir bang li seyda û alimên Kurd kir û axaftina xwe wiha berdewam kir: “Norşîn bajarekî bawermend e û Kurdistanî ye. Em ji vir bang li alimên Kurd dikin, li ser navê misilmantiyê qetla Kurdan ferz kirin û fermana me dan. Bersiva herî mezin dê ya alim û seydayên gelê Kurd be, em li bendê ne ku alim û seydayên Kurd berteke mezin nîşan bidin. Çarmixa Hz. Îsa dane pişta me û em kirin çar alî û her aliyekî me mixek lêxistin. Lê Kobanê, Rojava bi yekitiya xwe û berxwedana xwe ev çarmix parçe parçe kir. Kurdan xwe ji wê çarmixê rizgar kir û êdî tu kes nikare Kurdan ji hev parçe û dûr bike. 60 milyon Kurd li cîhanê ji bo siberoja xwe têdikoşe û li ber xwe dide. Ev berxwedan encam jî digire û wê serkeftinê bi xwe re bîne. Ev yekitiya ku li Rojava derket, hêviya Ehmedê Xanî, wesiyeta Qazî Mihemed, şîretê Seydayê Cegerxwîn û keda Rêberê Gelê Kurd Abdullah Ocalan e.”
‘Meseleya Kurd dê şewirmendan jî têk bibe’
Keskîn Bayindir bal kişand ser pêvajoya “Aştî û Civaka Demokratîk” û wiha dawî li axaftina xwe anî: “Bi pêşengtiya birêz Ocalan pêvajoyek hatiye destpêkirin û tê xwestin ku meseleya Kurd bi muzakereyan û aştiyê were çareserkirin. Gelek siyasetmedar û desthilat bersiveke nebaş didin. Her tim dixwazin me bikujin û înkarê bi me bidin qebûlkirin. Lê baş bizanin ku Kurd ziman, hebûn, nasname, statu û qanûnan dixwaze. Ji ber vê yekê bi hêzeke mezin, bi dileke xweş piştgiriyê dide pêvajoyê. Lê bila desthilat vê yekê xelet fêm neke, em bi hêz in û qawet in. Desthilatê niha meseleya Kurd teslîmê du qeşmerên şewirmend kiriye ku pênç qirûş nakin. Meseleya Kurd bi dehan desthilat têk biriye û dê wan şewirmendan jî têk bibe. Lewma rast û dirûst nêz bibin. Hêza me ya civakî li ser maseyên muzakereyan destê me xurt dike. Divê em ne dujminê hevûdu bibin, lewma divê em bi ruhê azadî û yekitiyê tevbigerin. Em rê nadin wan kesên ku yekitiya me xera bikin û dijminatiyê mezin û kûr bikin. Ew masiyên di akwaryûmê de ne, kê yêm bide wan strana wan dibêje. Kesên ku têkoşîna Kurdan biçûk dibînin, li erdê bixin. Em dê dilsoziya xwe li çar aliyên cîhanê bilind bikin û gelê Kurd dê pêşengiya mirovahiyê bike. Heta azadî, serkeftin û rizgariyê bijî yekitiya gelê Kurd û Kurdistanê.”
Piştî axaftinê çalakî bi çepikan bi dawî bû.
