Malbata Rojîn Kabaîş û gelen jin di salvegera kuştina Rojîn Kabaîş de heta gora wê meşiyan. Her wiha Platforma Jinan a Îzmîrê jî ji bo Rojîn Kabaîş çalakî li dar xist.
Malbata Rojîn Kabaîş ji bo salvegera kuştina Rojîn Kabaîş li taxa Şêx Şamîl heya goristana Yenîkoyê ya navçeya Rêzan a Amedê meşiya. Di meşê de Tevgera Jinên Azad (TJA), Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî), Baroya Amedê, Komeleya Hiqûqnasên ji bo Azadiyê (OHD), Komeleya Mafên Mirovan (ÎHD), Baroya Amedê, Komaleya Jinan a Rosa, Komên Alîgirê Amedsporê û gelek kes cih girtin.
Girseya ji bo Rojîn Kabaîş li taxa Şêx Şamîl kom bû berbi goristana Yenîkoyê ya navçeya Rêzanê meşiya. Di meşê de pankartên “Faîlên Rojîn bên dîtin”, “Rojîn re bibe deng”, “Ji bo Rojin edalet”, “Çi bi serê Rojîn hat?” hate vekirin. Girse bi dirûşmeyên “Jin jiyan azadî”, “Bijî berxwedana jinan” gihiştê li ser goristana Rojîn Kabaîş. Meş bi gihîştina li ser goristanê qediya.
Dayika Rojîn Kabaîş li goristanê axivî û wiha got: “Em ji bo keça xwe edaletê dixwazin. Rojîn xwe ne kuşt, ew hat kuştin.”
Seroka Komaleya Rosayê Suzan Îşbîlen jî bal kişand li ser polîtîkayên bêcezakirinê yên dewletê û got: “ Bila kujer bên dîtin, heya kujer neyên dîtin kuştina jinan nayên sekinandin.”
Xwişka Rojîn, Elîf Kabaîş jî bang li berpirsiyaran kir û got: “Bila êdî kujer derên holê.”
Piştî axaftina girse belav bû.
Îzmîr
Di salvegera qetilkirina Rojîn Kabaîş de li Îzmîrê çalakî hate lidarxistin. Tevgera Jinên Azad (TJA) Partiya Herêmên Demokratîk (DBP) Partiya Wekhêvî û Demokrasiyê ya Gelan (DEM Partî), Dayîkên Aştiyê li Qada îstasyonê ya Alsancakê heta Navenda Çandê ya Turkan Saylanê meşiyan.
Di çalakiyê de dovîzên “Rojîn li benda edaletê ye”, “Edalet ji bo Rojîn”, “Çi hat serê Rojîn?”, “Ji bo Rojîn bibe deng” û “Xeyalên Rojîn ên ku nîvco man li vir in” hatin hilgirtin. Her wiha dirûşmeyên weke “Heq hiqûq edalet”, “Bêdeng nemîne dê dor bê te jî”, “Pergal lê dixe dewlet diparêze” û “Jin jiyan azadî” hatin berzkirin.
