Tevî ku paqijkirina ji berfê ya Bûlwara Rihayê û Bûlwara Xarpêtê di bin berpirsiyariya Midûriyeta Rêyên Bejayî de ye jî xebat neda destpêkirin û Şaredariya Amedê neçar ma ku dest bi xebata paqijkirina rêyan bike.
Tîmên Şaredariya Bajarê Mezin a Amedê ku xebatên paqijkirina berfê û xwêkirinê li seranserê bajêr bêyî navber didomînin, li ser Rêyên Bejayî yên Riha û Xarpêtê jî dest bi xebatê kirin. Ev rê di bin berpirsyariya Midûriyeta Rêyên Bejayî de ne, lê ji ber ku xebat lê nehatibûn kirin trafîk sekinîbû.
Şaredariya Bajarê Mezin, ji ber barîna berfê ya dijwar, ji bo ku di gihandinê de astengî çênebin xebatên xwe didomîne. Tîmên ku ji serê sibê ve derketine sehayê, bi 40 wesayît û 180 xebatkaran xebatên paqijkirina rêyan û xwêkirinê berdewam dikin.
Ji ber ku li ser Rêyên Bejayî yên Riha û Xarpêtê tu xebat nehatibûn kirin, li ser baznerêkên derdorê astengî çêbûn. Li ser vê yekê, rayedarên Şaredariya Bajarê Mezin bi Midûriyeta Herêmê ya 9’emîn a Rêyên Bejayî re hevdîtinek pêk anîn.
Di encama hevdîtinê de piştî ku destûr hatin girtin, tîmên Şaredariya Bajarê Mezin li ser Bûlwara Rihayê û Bûlwara Xarpêtê dest bi xebatan kirin. Tîmên şaredariyê li her du bûlwaran jî xebatên paqijkirina rê û xwêkirinê bi awayekî çalak didomînin.
