Hevgirtina NADAyê êrîşên li ser taxên Şêxmeqsûd û Eşrefiye yên ji aliyê çeteyên hikûmeta demkî ve hatin kirin û tên kirin şermezar kir û got: “Bêdengî hevkarî ye.”
Hevgirtina Jinên Demokratîk a Rojhilata Navîn û Bakurê Afrîkayê (NADA), têkildarî êrîşên li ser taxên kurdan ên li Helebê de daxuyaniyek weşand û got, “Çeteyên hikûmeta demkî ya Şamê bi mehan taxên Şêxmeqsûd û Eşrefiyê yên Helebê dorpêç kirin û di 6ê çileyê de bi binpêkirina agirbest û sozên parastina kêmneteweyan bi çekên giran êrîşî taxan kir. Komên çete ketin nav taxan, herêm wekî herêmeke leşkerî hat ragihandin, xalên ketin û derketinê hatin girtin, elektrîk û înternet hate qutkirin û piraniya wan Kurd bi hezaran malbat rastî birçîbûn û êşê hatin. Şahidan piştrast kir ku cenaze bi buldozeran hatine komkirin. Bi berçavgirtina komkujiyên berê re xetera jenosîdeke nû derket holê. Di 5 rojên pevçûnan de, jin û zarok jî di nav de bi hezaran sivîl hatin qetilkirin û yekane sûcên wan sivîlan nasnameya wan a neteweyî bû. Paşguhkirina vê yekê, bi qasî bombebaranê xeternak e.”
Di daxuyaniyê de hate destnîşankirin medyaya ku bi cudakariya li dijî kesên rastî êrişan hatin a li gorî nasnameyên wan û hinek êşan weşand û hinek jî veşart, dev ji veguheztina rastiyê berdaye û bû hevkarê sûcan. Di berdewamê de wiha hat gotin: “Em bêdengiya şermok a navneteweyî, tengaziya saziyên Netewên Yekbûyî û hevkariya hêzên mezin ên ku dirûşmeyên mafên mirovan berz dikin, şermezar dikin. Ev bêdengî ji bo berdewamiya sûcan tê wateya ronahiyek kesk a zelal e û peyamekî ku xwîna hinek kesan yên din kêmtir bi qîmet dibîne, hildigre.”
Hevgirtina NADAyê da zanîn hedefgirtina sivîlan û qetilkirina girseyî sûcên li dijî mirovahiyê ne û bang kir: “Divê rêyên alîkariyê bên vekirin, birîndar bên rizgarkirin, mafên vegera ewle yan jî derketina gel bê mîsogerkirin, diyalog û danûstandin bên pejirandin, sivîl bên parastina, şandeyek navneteweyî ya serbixwe bê şandin û bi malbatên di bin dorpêçê de têkilî bê danîn.”
Di dawiya daxuyanî de bang hate kirin ku medyayê dev ji bêdengî û hilbijartina xwe berde û daxwaza hesabpirsîna qanûnî ya navneteweyî û bêceza nehiştina sûcdaran hate kirin. NADAyê, da zanîn bêdengî û paşxistin hevkarî ye û banga hevgirtinê kir.
