Amed – Lîstikvan û Endama Komîteya Amadekar a 11emîn Festîvala Şanoyê ya Navneteweyî ya Amedê Elvan Koçer da zanîn ku bi festîvalê ew xwestin ji pêvajoya heyî re bibin bersiv û wiha got: “Ji ber vê yekê me navê festîvalê kir ‘Ji bo aştiyê. Bi vê armancê me dît ku ne tenê ya me, pêdiviya hemû cîhanê bi aştiyê heye.”
Bajarê çand û dîrokê Amedê hefteya borî mazûvaniya bernameyeke têr û tije ya çand û hunerê kir. Şaredariya Bajarê Mezin a Amedê 11emîn Festîvala Şanoyê ya Navneteweyî ya Amedê di navbera 22yê Nîsanê û 2yê Gulanê de bi dirûşma “Ji bo aştiyê diyalog” lidarxist. Festîvalê komên şanoyê yên ji 19 welatan anî cem hev û li bajêr 10 rojan bi bernameyên cihêreng, pirzimanî û pirçandî mîhrîcan li dar xist. Di festîvalê de giştî 22 lîstik hatin pêşandan. Bernameya festîvalê ne tenê bi şanoyê re sînordar ma. Di mîhrîcanê de gotûbêj, panel, komxebat û hevdîtinên hunermendan hatin lidarxistin.
Komên şanoyê yên ji 19 welatên wekî Îtalya, Swîsre, Îran, Sûriye, Tûnis, Erebistana Siûdî, Filîstîn û Ukraynayê dika heman şanoyê parve kirin. Festîvalê armanc kir ku bi rêya hilberîna hunerî di navbera erdnîgariyên cuda de diyalog were sazkirin û pêwendiyên çandî werin xurtkirin. Festîval ji bilî hunermendan, derdorên akademîk jî anî cem hev. Ji beşên şanoyê yên zanîngehên Berlîn, Sûdan, Ukrayna, Silêmanî û Duhokê beşdarvan anî cem hevdû. Her wiha lîstikên biyanî bi sernivîsên Tirkî, Kurdî û Îngilîzî hatin lîstin û mêvanan eleqeyek mezin nîşanî festîvalê dan.
Lîstikvan û Endama Komîteya Amadekar a 11emîn Festîvala Şanoyê ya Navneteweyî ya Amedê Elvan Koçer têkildarî festîvalê ji ajansa me re axivî.
‘Me şanoya Kurdî li cîhanê daye nasîn’
Elvan Koçer da zanîn ku ev festîvala şanoyê lîstikên li welatên wan şer tê meşandin anî ba hev û got: “Me îsal 11emîn Festîvala Şanoyê ya Amedê jî me di vê çarçoveyê de amade kir. Em di nav sêyemîn şerê cîhanê de ne û Kurd jî her tim di navenda vî şerî de ne. Me jî wekî hunermend, wekî şanogerên Kurd bi perspektîfa yekitiyê, diyalogê, bi peyvên aştiyê got di vê pêvajoya em ji aştiyê re bersiva xwe wiha bidin. Ji ber vê yekê ‘Ji bo aştiyê diyalog’ bû navê festîvalê. Me jî bi lîstika xwe ya ‘Moraşîn’ di festîvalê de cîh girt û bi me re 18 komên welatên cuda cuda tev li festîvalê bûn. Wekî şanoya Amedê nasnameyeke me li qada cîhanê heye. Em her tim diçin û tên, projeyên hevpar çêdikin, têkiliyên me her tim hene. Ji ber ku me li qada cîhanê nasnameya xwe ya şanoya Kurd, şanoya Amedê daye nasîn xwe gihandina me ya koman ewqas hêsan bû. Bi vê festivalê têkiliya me ya bi şanogerên welatan re xurttir bû. Me bi şixulê xwe îspat kir û wekî şanoya Kurd di qada şanoya cîhanê de me cih girt.”
‘Ne tenê ya me, pêdiviya hemû cîhanê bi aştiyê heye’
Di dawiya axaftina xwe de Elvan Koçer diyar kir ku ji gelek welatên cuda kes û şanoger hatin Amedê û derbarê mijarê de ev tişt gotin: “Wekî çand, şano û şanoger bi vê wesîleyê jî me hevdû nas kir. Huner koka xwe ji çandê digire, bi kodên çandê em huner û şanoya xwe çêdikin. Lîstika ‘Moraşîn’ a ku tev li festivalê bû mînak bidim. Moraşîn bi cil, govend, çîrok, ritûel, karakter û bi temamî lîstikeke çandî ye. Bi vî awayî di resepsiyonê de jî ev tişt hebû, govend hebû, dengbêjî hebû. Hunermend û şanogerên ku ji welatên cuda hatin vir, yên ku li hember şer şano dikirin me hevdû û hêstên hevdû nas kir. Bi vê armancê me dît ku ne tenê pêdiviya me, pêdiviya hemû cîhanê bi aştiyê heye.”
