Malbatên di çarçoveya Peymana 29ê Çileyê de vegeriyane Efrînê şopên dagirkeriya Tirkiyeyê û çeteyên girêdayî wê tomar kirin. Di dîmenan de talana dagerker û çeteyan bi awayek şênber tê xuyakirin.
Di çarçoveya Peymana 29ê Çileyê ya di navbera Hêzên Sûriyeya Demokratîk (HSD) û Hikûmeta Demkî ya Sûriyeyê de, koma yekemîn a koçberên Efrînê vegeriya bû ser axa xwe. Lê belê şêniyên ku piştî salan vegeriyan, rastî malên talankirî û wêrankirî hatin.
Dîmenên talankirinê hatin tomarkirin
Malbateke ji navçeya Mabeta ku bi koma yekem re vegeriyaye, ji bo parastina ewlehiya xwe nexwest navê xwe eşkere bike, lê rewşa malên xwe bi dîmenan belge kir. Malbatê diyar kir ku her du malên wan di destê malbatên komên çekdar de bûn. Di dîmenên hatine parvekirin de tê xuyakirin ku xanî bi temamî hatine talankirin; qabloyên kehrebeyê, pencere û derî hatine dizîn û di hundirê malan de tenê gemar û kavil hatine hiştin.
Xaniyên şêniyan nayên valakirin
Li gorî agahiyên ji herêmê hatine girtin, ne tenê xaniyê vê malbatê, lê gelek xaniyên din ên şêniyên Efrînê hîn jî ji aliyê malbatên ku ji Xota, Idlib û deverên din hatine anîn, hatine dagirkirin. Hate ragihandin ku ev malbat xaniyên gelê Efrînê vala nakin. Malên ku tên valakirin jî, her tiştê di hundir de ji aliyê dagirkeran ve tê birin û mal bi vî rengî radestî xwediyên wan tê kirin.
Bi hezaran kes li benda vegerê ne
Tevî van şert û mercên giran û talankirinê jî, bi hezaran koçberên Efrînê yên li herêma Cizîrê û Kobanê hîn jî bi hêviya vegera li cih û warên xwe ne. Tê payîn ku di rojên pêş de komên nû yên koçberan ber bi Efrînê ve bi rê bikevin.
