Rojnameger Mehmet Alî Ertaş û rojnameger Roza Metîna têkildarî 6ê Nîsanê Roja Rojnamegerên Hatine Kuştin axivîn û gotin “Tevî hemû zext û zordariyan, em qet serî natewînin û em ê xwedî li mîrateya şehîdên çapemeniya azad derkevin.”
Rojnamegerên ku hatine kuştin her sal di 6ê Nîsanê Roja Rojnamegerên Hatine Kuştin de tên bibîranîn. Rojnameger Mehmet Ali Ertaş û rojnameger Roza Metîna bi wesîleya 6ê Nîsanê ji Ajansa Welat (AW) re axivîn. Her du rojnamegeran diyar kirin ku êrîşên li ser rojnamegeran ne tenê li kesan in, lê li mafê giştî yê civakê ne û wiha gotin: “Her ku rojnamegerek tê girtin an jî azadiya wî tê sînordarkirin, ev ne tenê êrîşek li dijî wî kesî ye, lê di heman demê de êrîşek li dijî mafê agahdarbûna civakê ye û ev yek ji bo demokrasiyê xetereyek mezin e.”
Rojnamegeran anîn ziman ku têkoşîna ji bo çapemeniya azad bidome û wiha pê de çûn: “Tevî hemû zext û zordariyan, em qet serî natewînin. Em ê xwedî li mîrateya şehîdên çapemeniya azad xwedî derkevin. Em ê ji bo parastin û ragihandina rastiyê têkoşîna xwe bidomînin.”
‘Rojnamegerî pîşeyeke gelekî bi rûmet û pîroz e’
Rojnameger Mehmet Alî Ertaş diyar kir ku li Tirkiyeyê û gelek deverên din ên cîhanê rojnamegerên ku li ser rastiyê radiwestin û dixwazin civakê agahdar bikin, rastî zext, gef, girtin û êrîşên cûrbecûr tên û ev rewş her roj zêdetir diçê asteke cidî. Rojnameger Ertaş ev tişt anîn ziman: “Rojnamegerî pîşeyekî gelekî bi rûmet û pîroz e û armanca sereke ya vî pîşeyî ew e ku rastiyan derxe holê û civakê bi awayekî rast û bêalî agahdar bike, lê em dibînin ku rojnamegerên ku bi rastî karê xwe dikin û dixwazin gel bigihînin rastiyê, tim û tim rastî astengiyan, zextan û êrîşan tên.”
‘Şerxwaz naxwzin rojnameger rastiyan ragihînin civakê’
Ertaş bi bîr xist ku rojnamegerên ku heqîqetê radigihînin er tim dibin hedef û wiha domand: “Ev rojnamegerên ku rastiyê tînin ziman, ji aliyê kesên ku berjewendiyên wan di veşartina rastiyan de hene nayên xwestin û bi taybet kesên ku şer û pevçûnan derdixin an jî heqîqetê berevajî dikin, naxwazin rojnamegerên rasteqîn dengê xwe bilind bikin û rastiyan ragihînin civakê.”
Di berdewama axaftina xwe de Ertaş şertên dijwar ên rojnamegeran wiha şîrove kir: “Ji ber vê yekê, li hemberî rojnamegerên azad û rasteqîn zext û gefên cûrbecûr tên meşandin, ew tên girtin, cezakirin, zîndankirin an jî bi rêyên cuda tên bêdengkirin, û ev hemû tevgerên ne tenê li dijî kesekî ne, lê di heman demê de li dijî rastiyê û mafê civakê yê agahdarbûnê ne.”
‘Zihniyeta li dijî çapemeniyê ne nû ye’
Rojnameger Roza Metîna jî bi berfirehî li ser dîroka êrîşên li dijî çapemeniyê sekinî û got: “Di dema ku em li dîrokê dinêrin, em dibînin ku di dema Îtihad û Teraqiyê de jî rojnameger dihatin qetilkirin û kesên ku em dibêjin muxalîf bûn dihatin hedefgirtin û ev nîşan dide ku zîhniyeta li dijî çapemeniyê ne tiştekî nû ye lê kevneşopiyeke dirêj heye.”
Roza Metîna diyar kir ku ev rewş heta îro jî berdewam dike û got: “Tiştê ku ji wî çaxî heta niha nehatiye guhertin ew e ku kujeran gelek caran ne tên cezakirin, û ev yek dibe sedem ku êrîşên li dijî rojnamegeran berdewam bikin û kesên din jî bi heman rêyê hereket bikin.”
‘Cîhan û Nazim sûcên şer teşhîr kirin’
Rojnameger Roza Metîna bal kişand ser bûyerên dawî û got: “Di van êrîşên dawî de jî em dibînin ku rojnamegerên wekî Cîhan Bîlgîn û Nazim Daştan ji aliyê dewleta tirk ve bûn hedef û hatin qetilkirin û ev kesan dizanîn ku ew dikarin rastî xetereyên mezin bên, lê dîsa jî wan sûcên şer û rastiyan teşhîr kirin.”
Roza Metîna di berdewamê de armanca zextan wiha şîrove kir: “Ji bo ku ev zîhniyeta sansurê dewam bike û ji bo ku manîpulasyon li ser civakê were pêkanîn, zexta li ser çapemeniyê her dem tê zêdekirin û ji ber vê yekê çapemeniya azad her tim di hedefê de ye.”
