Şirnex – Şaredariya Elkê ku di destê AKPê de ye, 2 sal in îhaleya Germava Zumrutê ya Elkê girtiye û deriyê wê ji xizmeta gel re girtiye. Şaredarê Elkê yê AKPî Habîp Aşan û hevkarê wî Azîz Yalçin bi 15 milyon TL îhale girtibûn. 2 sal in gel nikare biçe germavê.
Germava Zumrutê ya li navçeya Elkê ya Şirnexê hem ji aliyê tenduristiyê ve hem jî ji aliyê aboriya navçeyê ve xwedî cihekî girîng e. Germava Zumrutê di demsalên zivistanê de jî dema hewa -15 derece be germa wê 24 derece ne. Ji ber wê jî xwedî taybetmendiyeke bi vî rengî ye. Ji ber vê taybetmendiyê jî ji gelek nexweşiyan re şîfa ye. Berê gelek ji Kurdisatnê û derveyî welat dihatin germavê û ev yek jî ji bo aboriya navçeyê girîng bû.
Di sala 2020an de Walîtiya Şirnexê û Îdareya Taybet a Bajarê Şirnexê ji bo germavê projeyek derxistin. Ajansa Pêşketina Dîcleyê (DÎKA) jî 4,6 milyar ji bo projeyê veqetand. Proje ji aliyê Şeredariya Elkê, DÎKA û Îdareya Taybet a Bajar ve ve dest pê kir. Di nav projeyê de 26 daîre, 4 hewz û tesîsên civakî hebûn. Lê proje piştî ku ji sedî 70 wê temam bû hat sekinandin. Di sala 2023yan de tevî ku proje hê neqediyayê jî ji aliyê Walîtiya Şirnexê ve germavê derxistin ber îhaleyê. Îhale ji aliyê Serokê Şeredariya AKPê yê Elkê Habîp Aşan û hevkarê wî Azîz Yalçin ve bi 15 milyon lîreyê Tirk hat girtin.
Germav ji sala 2023yan vir ve girtî ye
Piştî ku îhaleya wê Serokê Şeredariya Elkê yê AKPê û hevkarê xwe wergirtin jî ji welatiyan re nehat vekirin. Germava bêheq niha girtî ye û welatî nikarin biçin bikevinê. Projeya çêkirina germavê hê jî neqediyaye. Niha çêkirina wê jî hatiye sekinandin û ne diyar e ku dê kengê dest pê bike. Tê gotin heke germav were vekirin jî dê êdî bi heq be û welatî nikarin belaş biçinê. Tevî ku welatiyên herême li dijî vê yekê gelek serlêdan kirin jî serlêdanên wan bê bersiv man. Welatiyên herêmê li dijî desteserkirina germavê bi gilî, gazin û hêrs in.
‘Em dixwazin tavilê germava me were vekirin’
Hacî Acar ê ji gundê Geliyê Gewda ku li nezî germave ye, diyar kir ku berê ji gelek bajaran welatî dihatin germavê û germav bê pere bû. Haci Acar bertek nîşanî girtina germavê da û wiha got: “Ev germava me ji bo gelek nexweşîyan baş e, şîfa ye. Em dibêjin bila yan germava me ji vî halî derxin an jî bila xera bikin, yanî bila gavek beriya gavekê ji xizmetê re were vekirin. Berê ji her derê Kurdistanê xelk dihat germavê û ji derveyî welat jî dihatin. Em wek xelkê gund ji bo çênekirina germavê bi hêrs û aciz in. Gotin em ê xweştir bikin lê xirabtir kirin. Daxwaza me ew e ku germava me careke din bê vekirin û weke berê milet bêpere ji germavê sûdê werbigire.”
