Serokê Giştî yê CHPê Ozgur Ozel bal kişand ser “Peymana 10ê Adarê” ya di navbera hikûmeta demkî ya Şamê û HSD de û got: “Divê Ereb, Kurd û Tirk di nav aştiyê de bijîn. Rêya vê yekê jî di destûreke wisa re derbas dibe ku her kes tê de cih bigire. Dengê ku ji Tirkiyeyê derdikeve, di vê xalê de avakar be.”
Serokê Giştî yê Partiya Gel a Komarî (CHP) Ozgur Ozel, li navçeya Saruhanli ya Manîsayê beşdarî merasîma vekirina gelek projeyan bû. Ozel di axaftina xwe de nirxandinên girîng li ser geşedanên dawî yên li Sûriyeyê û peywendiyên bi Tirkiyeyê re kir.
‘Şer feydeyê nade tu kesî’
Ozgur Ozel derbarê lihevkirina navbera Şam û Hêzên Sûriya Demokratîk (HSD) de destnîşan kir ku divê pêvajoya dîplomasiyê neyê astengkirin û wiha got: “Nabe ku em bikevin nav mantiqa ‘dem bi dawî bû, bila aştî nebe lê şer bibe’. Em di wê baweriyê de ne ku divê qada dîplomasiyê were firehkirin. Bêîstîkrariya li Sûriyeyê feydeyê nade tu kesî.”
‘Divê her kes di destûrê de cih bigire’
Ozel êrişên li dijî Elewî û Durzîyên li Sûriyeyê şermezar kir û ji bo çareseriyeke mayînde bal kişand ser qanûna bingehîn a nû û wiha got: “Me êrişên li dijî birayên xwe yên Elewî, Nusayrî û Durzî gelek caran şermezar kir. Divê Ereb, Kurd û Tirk di nav aştiyê de bijîn. Rêya vê yekê jî di destûrek bingehîn wisa re derbas dibe ku her kes tê de cih bigire. Divê dengê ku ji Tirkiyeyê derdikeve, di vê xalê de avakar be.”
Ozgur Ozel di dawiya axaftina xwe de ev yek anîn ziman: “Heke di vê pêvajoya aştiyê de li cîhanê, li Ewropayê an jî li Sûriyeyê erkek bikeve ser milê CHPê, em amade ne ku piştgiriyê bidin. Bes bila aştî pêk bê.”
