Rêxistinên DEM Partiyê yên Mûşê û Mêrdînê bi boneya maça ku dê Mardin 1969 Spor û Mûşsporê li Amedê bilîzin, civînek li dar xistin û diyar kirin ku her du tîm jî tîmên Kurdistanê ne û destnîşan kirin ku yê qezenc bike gelê Kurd e.
Mardîn 1969 Spor û Mûşspor dê ji bo derketina Lîga 1emîn îro saet di 17:00an de li sehaya Tahîr Elçî ya Amedê bên hemberî hev. Rêxistinên DEM Partiyê yên Mûş û Mêrdînê beriya maçê li Çand Amedê ya navçeya Yenîşehîr a Amedê civînek li dar xistin. Rêveberiyên Mardin 1969 Spor, Mûşspor, Amedspor û Parlamenterên DEM Partiyê Sirri Sakik, George Aslan, Hevşaredarê Bajarê Mezin ê Mêrdînê Ahmet Turk ku qeyim tayînî şûna wî hatiye kirin û rêxistinên DBPê û DEM Partiyê yên Amedê û gelek kes tev li civînê bûn.
‘Em ê werzîşa civakî pêş bixin’
Hevserokê DEM Partiyê yê Mûşê İlyas Aslan diyar kir ku dê tenê ne li ser skorekê hûr bibin û got: “Werzîş ji bo me bingeha herî mezin a aştiyê ye. Di maça îro de serkeftî em bi xwe ne. Ev maç dê piştgiriya di navbera gelan de nîşan bide. Li şûna têgihiştineke werzîşê ya endustriyel, em ê werzîşa civakî pêş bixin û biparêzin.”
‘Bila hevaltî qezenc bike’
Hevşaredarê Mûşê Sirri Soylemez, bi pîrozkirina şampiyoniya Amedsporê dest bi axaftina xwe kir û got: “Mardinspor an jî Muşspor qet ferq nake, yê ku qezenc bike dê gelê me be. Em ji bo her du tîman jî serkeftinê dixwazin û dibêjin bila hevaltî û rêhevaltî qezenc bike.”
‘Yê ku qezenc bike dê gel bi xwe be’
Hevşaredarê Bajarê Mezin ê Mêrdînê Ahmet Turk jî dest nişan kir ku werzîş gelan nêzî hev dike û wiha got: “Îro li Amedê her kes bi coşeke mezin dibêje ku ‘Yê qezenc bike gelê me ye.’ Her du tîm jî tîmên Kurdistanê ne. Ji ber vê yekê, ya ku li me tê ew e ku em bi sîpanî û bi aramî heyecana vê maça xweş bijîn. Yê ku qezenc bike dê gel bixwe be.”
‘Em di navbera her du tîman de cudahiyê nakin’
Parlamenterê DEM Partiyê yê Agiriyê Sirri Sakik jî diyar kir ku Amedsporê bi serkeftina xwe ve ruhê yekîtiya neteweyî ya Kurdan derxist pêş û wiha axivî: “Îro em di navbera her du tîmên xwişk û bira de tu cudahiyê nakin. Her du jî tîmên me ne û em ê bi hev re temaşeyî vê pêşbaziyê bikin. Divê em li ser vê xakê yekîtiya xwe ava bikin. Bijî Amedspor, bijî Mûşspor, bijî Mêrdînspor!”
