Rêveberiya Nexweşxaneya Gel a Qamişloyê agahî da ku beşa şûştina gurçikan ji ber dorpêçkirina Rojavayê Kurdistanê dibe ku bisekine û diyar kir ku ev yek jiyana bi dehan nexweşan dixe xetereyê.
Ambargo û êrişên li ser Rêveberiya Xweser a Bakur Rojilatê Sûriyê bandorek neyînî li ser jiyana gel dike. Li Nexweşxaneya Gel a Qamişloyê ku xizmetê dide bi sedan nexweşan ji ber ambargoyê bi astengiyên mezin re rû bi rû ye. Li gorî agahiyên Rêveberiya Nexweşxaneya Gel Meysai Meter diyar kir ku hefteyê du caran gurçikên her nexweşekê têne şûştin.
‘Bi koçberiyê de hejmar zêde bû’
Meysai Meter anî ziman ku piştî êriş li ser Herêma Bakur û Rojhilatê Sûriyeyê dest pê kirîn heta niha bi gelek astengiyan re rû bi rû mane û wiha got: “Bi sedan koçberên Efrînê ji Tebqa û Reqayê derbasî bajarê Qamişlo bûne, hejmara nexweşên gurçikan têne nexweşxanê gelekî zêde bûne û niha zexteke mezin li ser beşa şûştina gurçikan heye.” Meter derbirî ku rêjeya dermanê gurçikan ê li gel wan heye têrê nake ku pêdiviya hemû nexweşan pêk bîne û destnîşan kir ku beşa şûştina gurçikan bisekine dê jiyana hemû nexweşên gurçikan bikeve xetereyê.
Derman têra pêwistiyê nakin
Ji bo madeyên şûştina gurçikan jî Meter ev agahî dan: “Pêdiviya nexweşxanê bi madeyên weke fîlter, lûle, fistula, asîd, toz û seruma heparînê heye. Ev madeyên ji bo şûştina gurçikan li herêmê nayên peydakirin. Li nexweşxanê jî ev made heyanî 10 rojan têrê dikin. Eger ev made neyên peydakirin wê di laşê nexweşan de jehr kom bibe û ev yek dê bandorê li dil û sinirên wan bike.”
Meter diyar kir ku berî ev êriş dest pê bike wan ev madeyên ji bo şûştina gurçikan ji Reqayê û Helebê dianîn û niha ji ber dorpêçê nikarin xwe bigihînin van dermanan. Meter di dawiyê de got ew di vê rewşê de bi tenê dikarin bi rêya rêxistinên mafên mirovan van madeyan peyda bikin.
