Çalakiya Xizmên Windayan di hefteya 869an de li parka Koşuyolêyê aqûbeta Vahît Narîn hat pirsîn. Di çalakiyê de Saziya Mafê Mirovan ya şaxa Amedê (ÎHD), malbata Vahît Narîn û gelek xizmên windayan li ber Bîranîna Mafê Jînê cihê xwe girtin. Endamê Komîsyona Windayan Firat Akdenîz vê hefteyê derbarê çalakiyên xizmên windayan de axivî. Di berdewamiya çalakiyê de Rêvebera ÎHDê Eylem Kaya di bîranînê de çîroka Vahît Narîn xwend.
Endamê Komîsyona windayan Firat Akdenîz di çalakiya hefta 869an de çalakiyên heya vê rojê hatiye kirin nirxand û got: “ Dayikên me derketin qada û qêrîn kirin gotin zarokên me li kuderê ne? Mirî yan jî sax em xizmên xwe dixwazin eger ku mirî be hestiyê xwe dixwazin. Ji bo xizmên xwe şîna we daynin. Lê heya em cinazê xwe negrîn şîna me dawî nabe. Dîsa em vê qadê bang dikin û dibêjin wek xizmên malbata wek parastina mafê mirovan heta wendahiyên me dawî neyê dîtin em vê tekoşîna xwe bernadin. “
Çîroka Vahît Narîn ji aliyê Eylem Kaya ve hat xwendin. Eylem Kaya ev tişt anî ziman: “Vahît Narîn di sala 1992an de li Pasûrê otela xwe de ji aliyê leşkeran ve hat înfazkirin. Piştî înfazkirinê Vahît Narîn di otelê de hat şewitandin. Paşê dozgerî ji bo otopsiyê bang malbatê kir. Kurê Vahit Narîn, Nîmet Narîn ku beşdarî otopsiyê bû, gilî kir. Ev pêvajoya ku bi salan dom kir, ti encam neda. Paşê malbatê doz bire Dadgeha Mafên Mirovan a Ewropayê. Dadgeha Mafên Mirovan a Ewropayê di vê dozê de Tirkiye mehkûm kir. Rojek beriya bidawîbûna dema doza Vahît Narîn, dozgeriyê bi awayekî neçaverêkirî li dijî leşkerekî tedbîr girt û ev kes hat girtin. Doz hîn jî berdewam dike.”
Piştî xwendina çîroka Vahît Narîn çalakî bi 1 deqîqeyek rûniştinê dawî bû.
