Li Qoserê bi hezaran kes li dijî êrişên Rojava meşiyan û piştgirî dan berxwedana Rojava. Hevseroka DBPê Çîgdem Kiliçgun Uçar piştî meşê axivî û got: “Tişta li Rojava tê parastin nasnameya gelê Kurd û têkoşîna gelê Kurd e. Em ji wan nemerdên ku porê keçeke Kurd jê kir re, bi hev re dibêjin ‘Jin jiyan azadî’.”
Platforma Saziyên Demokratîk li dijî êrişên li ser Rojava tevî barîna berfê li navçeya Qoserê ya Mêrdînê meşek li dar xist. Bi hezaran kesên li Qada Azadiyê kom bûn li vir dirûşmên “Bijî berxwedana Rojava”, “Bijî berxwedana Kobanê”, “Bijî berxwedana gelê Kurd”, “Jin jiyan azadî”, “Rojava rûmet e rûmeta gelê Kurd e”, “Bijî yekîtiya gelê Kurd”, “Rojava Rojhilat e Kurdistan yek welat e” berz kirin. Gel sirûdan xwend û piştgirî da berxwedana Rojava. Dowîzên ku keziyên şervanên YPJê yên hunandî li serê bûn û “Jin jiyan azadî” li ser dinivîsî hatin hilgirtin. Hevseroka Partiya Herêmên Demokratîk (DBP) Çîgdem Kiliçgun Ûçar û parlamenterên DEM Partiyê, hevşaredar û pêkhateyên Platforma Saziyên Demokratîk di nav de bi hezaran kes tev li meşê bû. Girseya ku ji Qada Azadiyê dest bi meşê kir heta Parka Mehmet Sîncar a li Taxa Berçem bi dirûşman û sirûdan meşiyan. Di dema meşê de welatiyan bi lêdana korneyên wesayîtan piştgirî dan meşê.
Piştî ku girse gihişt Parka Mehmet Sîncar, li vir Hevseroka DBPê ya Giştî Çîgdem Kiliçgun Ûçar axivî.
‘Gelê Kurd ji bo azadiya xwe li ser pêyan e’
Çîgdem Kiliçgun Ûçar bi bîr xist ku gelê Kurd ji 6ê Çileyê ve ji bo azadiya xwe li ser pêyan e û wiha got: “Di sedsala 21emîn de gel ji ber nasnameyên xwe tên qetilkirin. Gelê Kurd, Durzî û Elewî li Rojava ji ber nasnameya xwe tên qetilkirin. Gelê Kurd tevî sînorên we xêz kirin tu car dest ji yekîtiya xwe bernedan.” Çîgdem Kiliçgun Ûçar di berdewama axaftina xwe de wiha got: “Dema dibêjin Rojava şoreş tê bîra me, ewilî jî şoreşa jinan. Em ji kesên ku pişta xwe didin HTŞê û ji nemerdê ku porê keçeke Kurd jê kir re bi hev re dibêjin ‘Jin jiyan azadî’. Em ê wekî jinan têkoşîna xwe ya azadiyê bidomînin. Em ê tu car bi paş ve gavê neavêjin. Jin jiyan azadî di cîhanê de bû rêber, em kêfxweş in ku jinên Kurd pêşengtiya vê dikin.
Tişta li Rojava tê parastin nasnameya gelê Kurd û têkoşîna gelê Kurd e. Ji ber wê em bi yek dirûşmê dimeşin û dibêjin, ‘Bijî berxwedana Rojava’. Di pêvajoya em tê de çareseriya pirsgirêka Kurd pêkan bû lê em dibînin ku şûna axaftin û muzakereyan şer hate tercîh kirin. Em ji we dipirsin. Di serî de Tirkiye Rojhilata Navî çi bidestxist? Tu tişt. Em dipirsin gelê Kurd li hemberî vî şerî bi paş ve gav avêt? Na. Em dizanin têkoşîna gelê Kurd li Tirkiyeyê û Rojhilata Navîn teminata herî xurt a demokrasi û azadiyê ye.”
‘Kobanê tenê ne bajarek e’
Çîgdem Kiliçgun Ûçar got ku “Kobanê ne tenê erdnîgariyeke” û axaftina xwe wiha domand: “Di hişê me de cihekî Kobanê yê gelek girîng heye. Kesên xwestin bi ketina Kobanê desthilata xwe bihêz bikin dîtin ku Kobanê neket. Dibêjin em ê Kobanê jinûve bêxin. Ez ji vir dipirsim ‘Hûn ê destûr bidin?’ Me duh çawa Kobanê parast em ê niha jî biparêzin. Tu tişt nikare pêşiyê li têkoşîna gelê Kurd bigire. Em ji hêzên navnetewî û herêmî dipirsin hûn çi ji gelê Kurd dixwazin çi ji têkoşîna azadiyê ya jinan dixwazin. Azadiya gelekî dikare were astengkirin? Têkoşîna azadiyê ya gelekî çawa nayê dîtin? Hûn çiqas nebinin jî em gotina xwe ya ‘Bijî berxwedana Rojava’ bibêjin û têkoşîna xwe bilindtir bikin.”
‘Divê her kes li dijî manûpulasyonê hişyar be’
Çîgdem Kiliçgun Ûçar destnîşan kir ku li ser çapemeniyê manîpulasyoneke zêde heye û axaftina xwe bi dawî kir: “Kesên porê jinan jê dikin û tecawizî jinan dikin terorîst in an Hêzên Sûriyeya Demokratîk ya li Sûriyeyê Elewiyan Durziyan diparêze terorîst e? Em ji vir bang li gelên Tirkiyeyê dikin. Guh û çavên xwe ji manîpulasyona di çapemeniyê re bigirin. Her gava hûn pêşiyê li HTŞê vekin dê tarîtî were Rojhilata Navîn û welatan. Têkoşîna vî gelî nikare were tarîkirin.
Em ê banga 27ê Sibatê dubare dubare bînin ziman. Hemû nirxên li vî welatî bi keda me hate hunandin. Kesên li vê erdnîgariyê dijîn xwediyê vê erdnîgariyê ne. Yek ne xwedî yek jî kole ye. Divê têkoşîna ku sedan sal in tê meşandin êdî bi demokrasiye û azadiyan were tacîdarkirin. Bi vê minasebetê rêya em dimeşînin rêya azadiyê ye, têkoşîna em diparêzin azadiya gelan e. Bijî berxwedana Rojava.”
Piştî axaftina Çîgdem Kiliçgun Uçar çalakî bi dawî bû.
