Partiya Yekîtiya Ermen nerazîbûn nîşanî dûrxistina Ermeniyan a ji hilbijartinên Meclisa Gel da û diyar kir ku divê hemû pêkhate bi rengekî wekhev û adilane bên temsîl kirin.
Partiya Yekîtiya Ermen der barê hilbijartinên Meclisa Gel ên li Sûriyeyê de daxuyaniyek weşand. Partiyê fikarên xwe yên ji pêvajoya hilbijartinên Meclisa Gel û komîteyên girêdayî wê anîn ziman û destnîşan kir ku pêkhateya Ermen beşeke resen a civaka Sûriyeyê ye, lê ji beşdarbûn û nûnertiya siyasî tê dûrxistin.
‘Binpêkirina edaleta neteweyî ye’
Partiyê da zanîn ku dûrxistina pêkhateya Ermen binpêkirina rêgezên edaleta neteweyî ye û ev yek bandoreke neyînî li ser meşrûiyeta xebatên siyasî û pêşeroja nûnertiya neteweyî ya welêt dike. Partiya Yekîtiya Ermen di daxuyaniyê de xwest ku ji parêzgehên Hesekê, Reqa, Dêrazor, Şam û Helebê nûnertiya civaka Ermeniyan di Meclisa Gel de hebe û ev daxwaz bilêv kir: “Divê mafê Ermeniyan ê hilbijartina nûnerên xwe hebe. Ev yek misogeriya edaletê ye.”
‘Asûrî û Kurd jî hatin paşguhkirin’
Partiyê her wiha bal kişand ser nebûna nûnertiya Asûriyan û diyar kir ku Asûrî jî pêkhateyeke resen a herêma Cizîrê ne. Partiyê, şêwazê dabeşkirina kursiyên hilbijartinê yên li ser pêkhateyan red kir û da zanîn ku pêkhateya Kurd û yên din jî di vê pêvajoyê de hatine paşguhkirin.
‘Bingeha Sûriyeyeke nû nûnertiya adilane ye’
Partiya Yekîtiya Ermen destnîşan kir ku serkeftina her pêvajoyeke hilbijartinê ya demokratîk bi pêkanîna nûnertiyeke adilane û hevseng a ji bo tevahiya pêkhate, ol û baweriyan ve girêdayî ye. Partiyê daxuyaniya xwe bi van gotinan bi dawî kir: “Divê Sûriyeya nû li ser bingeha hevkariya neteweyî, rêzgirtina ji bo cihêrengiyê û misogerkirina mafên siyasî yên hemû pêkhateyan bê avakirin; tenê bi vî rengî yekîtî û aramiya welêt dikare bê xurtkirin.”
