Serokê Partiya Yisrael Beiteinu Avîgdor Lîeberman ku wezîrtiya parastin û karên derveyî kiribû hikûmeta Netanyahû rexne kir û anî ziman ku li Sûriyê şûna wekîlên Îranê wekîlên Tirkiyeyê hatine ser desthilatê û ev yek ji bo Îsraîlê wekî talûkeyek mezin bi nav kir.
Serokê Partiya Yisrael Beiteinu Avîgdor Lîeberman ku wezîrtiya parastin û karên derveyî kiribû tev li konferansek têkildarî pêşketinên li Rojhilata Navîn axivî. Lîeberman bal kişand ser pêşketinên li Sûriyê û wiha got: “Me li Sûriyê rejîma Beşar Esad ku wekîlê Îranê bû bir û HTŞ anî. HTŞ jî El Qaîde bi xwe ye bi cih bû. Ev yek bû sedem ku Tirkiye bikeve Sûriyê û xwe bi cih bike.”
Îran derket Tirkiye hat
Lîeberman bi gotina, “Me li Sûriyê rejîma Esad şand û El Qaîde anî şûna wê. Ango Îran derket Tirkiye bi cih bû û niha hewl dide li vir serwer bibe. Niha Tirkiye hewil dide F-35an bikire û kes firotin û ne firotina wan ji me napirs e. Plana firotina F-35an ji bo Tirkiyeyê talûkeyek micid e. Niha jî Tirk li Xezeyê ne.” Lîeberaman destnîşan kir ku dengeyên herêmî diguherin û ev yek bi xwe re talûkeyên mezin ji bo Îsraîlê tîne.”
Rola Îsraîle îtîraf kir
Lîeberman polîtîkayên Hikûmeta Benjamîn Netanyahû rexne kirin û banga guherîna hikûmetê kir. Lîeberman xwest ku polîtîkayek van talûkeyan dibîne û demildest tedbîran digire bi cih bîne. Bi vê daxuyaniyê yekem car rola Îsraîlê ya li ser guherînên Sûriyê û hatina HTŞê ya li ser kar ji hêla siyasetmedarek Îsraîlê ve hate destnîşankirin.
